“Azərbaycan 44 günlük Vətən müharibəsindən sonra suverenliyini tam bərpa etdi” - Deputat
Sabah Azərbaycanda Suverenlik Günü qeyd olunacaq. 20 sentyabr xalqın dövlət müstəqilliyini təsdiqlədiyi və suverenliyini qorumaq iradəsini nümayiş etdirdiyi önəmli tarixdir. 2020-ci ilin İkinci Qarabağ müharibəsi zamanı əldə olunan zəfər isə Azərbaycan xalqının birliyini və azadlıq uğrunda qətiyyətini bir daha göstərmişdir.
Bu barədə Milli Məclisin deputatı Naqif Həmzəyev Crossmedia.az-a açıqlama verib.
Deputat, suverenliyimizin hər qarış torpaqda bərpa olunduğunu bildirib:
“44 günlük Vətən müharibəsindən sonra Azərbaycan Ermənistan tərəfinə sülh əlini uzatdı. Ermənistan Silahlı Qüvvələrinin, qeyri-qanuni on mindən çox hərbçisinin və separatçıların Azərbaycan ərazilərini tərk etməsinə dəfələrlə çağırış edildi. Buna baxmayaraq, Ermənistan tərəfi təxribatlara əl atdı, beynəlxalq gücləri və öz tərəfdarlarını arxalarına alaraq, beynəlxalq platformalarda Azərbaycana qarşı təzyiqləri artırdı. Azərbaycanın 44 günlük Vətən müharibəsində əldə etdiyi zəfəri isə görməzdən gəldi. İmzalanmış üçtərəfli bəyanatın müddəalarını yerinə yetirməkdən boyun qaçırdı və 2021-ci il və sonrakı illərdə istehsal edilmiş erməni minalarını Azərbaycan ərazilərinə basdıraraq əlavə problemlər yaratdı.
Nəticədə, Azərbaycanın 360-dan çox mülki və hərbi şəxsi bu minalarla əlaqədar yaralandı, bəzi vətən oğulları şəhid oldu, bəziləri əzalarını itirdi. 2023-cü ilin aprel ayında Laçın yolu üzərində ekoloji keçid məntəqəsi formalaşdırıldı və Azərbaycan, ekoloji fəallar tərəfindən qanunsuz fəaliyyət göstərən erməni şirkətlərinin fəaliyyətlərini dayandırmaq üçün aksiyalar başlandı. Bütün bu proseslər, erməni qanunsuz silahlı dəstələrinə və Azərbaycan ərazisində fəaliyyət göstərən qanuni-qanunsuz şirkətlərə qarşı sonuncu xəbərdarlıq idi".
O xatırladıb ki, buna baxmayaraq, Ermənistan tərəfi yenidən təxribatlara əl atdı: "2023-cü ilin sentyabr ayında polis nümayəndələrimiz mina qurbanı oldu. Bu təxribatların qarşısını almaq və erməni terrorunun kökünü qazmaq məqsədilə Azərbaycan Silahlı Qüvvələri antiterror əməliyyatlarına başladı. 19 sentyabr tarixində başlayan əməliyyat bir gün davam etdi və qanunsuz dəstələr ağ bayraq qaldırmaq məcburiyyətində qaldılar. Nəticədə, 20 sentyabr 2023-cü ildə Azərbaycanın suverenliyi tam bərpa olundu.
O gündən etibarən, hər il 20 sentyabr Dövlət Suverenliyi Günü kimi qeyd olunur. Azərbaycanın bütün rayon və şəhərlərində, xüsusilə Xankəndi, Xocalı, Xocavənd və digər bölgələrdə Azərbaycan bayraqları dalğalanır. Silahlı qüvvələrimiz sərhəd boyu möhkəmləndirildi və hər bir qarış torpağımızda suverenliyimiz tam bərpa olundu. Bu günlərdə biz öz torpaqlarımızda azad və firavan yaşayırıq.
İki ildən artıq müddət ərzində cənab Prezident, Ali Baş Komandan, Azərbaycanın bütün rayon və şəhərlərinə, işğaldan azad olunmuş ərazilərə səfərlər etdi. Üçrəngli bayrağımız hər bir rayon və şəhərdə dalğalanır və keçmiş məcburi köçkünlər artıq öz torpaqlarına qayıdır. Hər gün yeni ailələrin işğaldan azad olunmuş ərazilərə köç etdiklərinə şahidlik edirik. Bu səfərlər zamanı soydaşlarımızın öz həyatlarını xoşbəxt şəkildə davam etdirdiklərini görürük.
Bütün şəhidlərimizə Allahdan rəhmət diləyir, qazilərimizə can sağlığı arzulayırıq. Ali Baş Komandanımıza dərin təşəkkürümüzü bildirirəm ki, bu günləri bizə yaşatdı. Şükürlər olsun ki, biz bu günləri birlikdə yaşayırıq. Eşq olsun Azərbaycan ordusuna! Eşq olsun Azərbaycan xalqına! Yaşasın Ali Baş Komandan, cənab Prezident İlham Əliyev!”.
Nicat Rüstəmzadə
20:50 19.09.2025
Oxunuş sayı: 1658
