Xankəndidə ali səviyyəli tədbirlərin təşkili böyük tarixi məna daşıyır- Deputat
Azərbaycanın tarixi və mənəvi mərkəzlərindən biri olan Şuşa son illərdə təkcə mədəniyyət paytaxtı kimi deyil, həm də yeni diplomatik mərkəz kimi formalaşmaqdadır. Tarixi ənənələrin davamı olaraq burada dövlət başçılarının görüşləri, beynəlxalq tədbirlər və ali səviyyəli rəsmi qəbul mərasimləri keçirilir. Ənənəvi olaraq paytaxtlarda tətbiq olunan diplomatik protokol qaydalarının – dövlət himninin səsləndirilməsi, fəxri qarovul dəstəsinin düzülməsi, qırmızı xalça mərasimi və zəngin mədəni proqramların – Şuşada yüksək səviyyədə icra olunması şəhərin diplomatik məkana çevrilməsinə zəmin yaradır.
Türk Dövlətləri Təşkilatının toplantıları, dünya liderlərinin Şuşaya səfərləri və Qarabağın rəmzinə çevrilmiş atların nümayişi bu şəhərin yalnız Azərbaycan üçün deyil, həm də Türk dünyası və beynəlxalq ictimaiyyət üçün əhəmiyyətini göstərir. Beləliklə, Şuşa Azərbaycanın siyasi mədəniyyətini öz milli kökləri üzərində inşa etdiyini nümayiş etdirən, diplomatiya və mədəniyyətin qovuşduğu strateji bir mərkəz kimi formalaşır.
Mövzu ilə bağlı Crossmedia.az-a açıqlama verən Milli Məclisin deputatı Jalə Əliyeva bildirib ki, bu gün işğaldan azad olunmuş bütün ərazilərdə genişmiqyaslı quruculuq və inşaat işləri gedir: “Eyni zamanda, bu torpaqlarda bizim mədəniyyətimiz, diplomatiyamız, siyasətimiz və Azərbaycanın bütün sahələr üzrə inkişafı öz əksini tapır. Azərbaycanın diplomatiya uğurları həddindən artıq böyükdür. Bu zəfərin həm döyüş meydanında, həm də diplomatiya masası arxasında əldə edilməsi birbaşa olaraq ölkəmizdə həyata keçirilən uğurlu daxili və xarici siyasətin nəticəsidir. Bu uğur cənab Prezident İlham Əliyevin siyasi, diplomatik, iqtisadi, hərbi və mədəni uğurudur”.
Deputat vurğulayıb ki, Qarabağın incisi olan Şuşa şəhərində mütəmadi olaraq beynəlxalq tədbirlər keçirilir, eyni zamanda Xankəndidə də ali səviyyəli tədbirlərin təşkili böyük tarixi məna daşıyır:
“Bu tədbirlərin hər birinin müxtəlif çalarları və mənaları vardır. İlk növbədə, onların Qarabağımızda keçirilməsi 30 il işğal altında qalmış torpaqlarımızın göz yaşlarının birdəfəlik silinməsi, artıq uğurlara imza atılması və bundan sonra Azərbaycanın əbədi olaraq mühüm tədbirlər həyata keçirəcəyinin simvolik rəmzidir”.
J. Əliyeva əlavə edib ki, dünyanın nüfuzlu dövlətlərinin Qarabağa səfər etməsi, burada aparılan quruculuq işləri ilə tanış olması regionun yalnız iqtisadi deyil, həm də diplomatiya sahəsində böyük addımlarla irəlilədiyini nümayiş etdirir.
Mehriban Yariyeva
18:28 19.09.2025
Oxunuş sayı: 1468
