TRİPP geniş coğrafiyanı birləşdirən layihədir - Ekspert
Ermənistanın Baş naziri Nikol Paşinyan Azərbaycanla sülh prosesinin institutlaşdırılmasına sadiqliyini bəyan edib. O, ABŞ Prezidenti Donald Trampın vasitəçiliyi ilə imzalanan tarixi sazişə görə təşəkkürünü bildirib və TRIPP layihəsinin həyata keçirilməsi istiqamətində işləri davam etdirəcəyini vurğulayıb.
Paşinyanın açıqlaması bölgədə sabitlik və davamlı sülhün qurulması üçün mühüm mesaj kimi görünür. Lakin bu prosesin real nəticə verməsi tərəflərin öhdəliklərə sadiqliyindən və praktiki addımların atılmasından asılı olacaq. TRIPP layihəsi isə siyasi yanaşı iqtisadi inteqrasiyanı da gücləndirə bilər.
Mövzu ilə bağlı Beynəlxalq Münasibətlərin Təhlili Mərkəzinin baş məsləhətçisi, siyasi elmlər üzrə fəlsəfə doktoru, Mətin Məmmədli Crossmedia.az-a açıqlama verib.
O, TRİPP layihəsinin reallaşmasının bölgədə uzunmüddətli sabitliyə ciddi töhfə verəcəyini bildirib:
“8 avqust Vaşinqton görüşündə əldə olunan əsas razılaşmalardan biri TRİPP layihəsi ilə bağlı idi. TRİPP layihəsinin reallaşması bölgədə birmənalı olaraq sülhün, əmin-amanlığın və uzunmüddətli sabitliyin formalaşmasına ciddi töhfə verəcək. Kommunikasiya xətlərinin regionda açılması həm iki ölkə arasında etimadın qurulmasını gücləndirəcək, həm də hər iki ölkənin müəyyən iqtisadi, ticarət və logistika maraqlarını formalaşdıracaq. Qeyd etmək lazımdır ki, TRİPP layihəsinin reallaşması yalnız iki ölkənin deyil, həm də regionda maraqları olan digər qonşu dövlətlərin də marağındadır. Bu, geniş bir coğrafiyanı birləşdirən bir layihədir və bölgədə logistik xətlərin açılması, o cümlədən TRİPP layihəsinin reallaşması uzunmüddətli sabitliyə töhfə verə bilər”.
Nicat Rüstəmzadə
13:00 18.09.2025
Oxunuş sayı: 1110
