“İravunk”: Nikol rusları razı salmaq üçün Aleni qurban vermək qərarına gəlib
Ermənistanın Baş naziri Nikol artıq 2026-cı il parlament seçkilərinə aktiv şəkildə hazırlaşır.
Crossmedia.az xəbər verir ki, bu barədə Ermənistanın “İravunk” nəşri yazıb.
Nəşrə görə, Gümrü və Parakar seçkiləri Paşinyan üçün ciddi həyəcan siqnalı olub ki, hakim partiyanın vəziyyəti ağırdır.
“Sosial sorğular da göstərir ki, Nikolun reytinqi hətta 20 faizi belə keçmir. Bu çətin şəraitdə Nikol yenidən seçilməsini təmin etmək üçün xarici əsas oyunçularla dil tapmağa çalışır. Lakin bu sahədə də Nikol üçün hər şey olduqca dolaşıqdır. Gündən-günə dəyişən geosiyasi vəziyyətdə bir il sonra dünyada nə baş verəcəyi aydın deyil. Elə buna görə də Nikol bilmir kimlə nəyi razılaşdırsın. Öz xarakterinə uyğun olaraq, o, həm rusları, həm amerikalıları, həm avropalıları, həm də türkləri razı salmağa çalışır. Bunun nə dərəcədə mümkün olacağı isə sual altındadır”, - deyə KİV qeyd edib.
Müəllif bildirib ki, lakin rusları razı salmaq üçün Paşinyan rusların xoşlanmadığı Ermənistan parlamentinin sədri Alen Simonyanı qurban vermək qərarına gəlib.
“Halbuki Alenin Ermənistan daxilində də kifayət qədər mənfi reytinqi var. Alenlə bağlı qalmaqallar sırasına bu yaxınlarda bir sıra xarici KİV-lərdə dərc olunan məqalələr də əlavə olundu, orada Alen amerikalı pedofil Epşteynlə müqayisə olunurdu. Bundan başqa, Nikol Aleni qlobalistlərin Baş nazir postuna əsas namizədi hesab edir, qlobalistlərin uğuru halında Alen onu əvəz edə bilər. Nikolun ətrafının sözlərinə görə, Alen məsələsi artıq həll olunub və Nikol qalib gəldiyi halda o, gələcək parlamentin sədri olmayacaq. Bununla bağlı Nikol artıq ruslara təminat verib, Alenin isə çox çırpınmaması üçün onun ən yaxın qohumları ilə bağlı cinayət işlərini yarımçıq vəziyyətdə saxlayır”, - deyə nəşr vurğulayıb.
13:07 16.09.2025
Oxunuş sayı: 4491
