Joğovurd”: Andreasyanın təyin olunması maraqlar toqquşmasıdır
Avqustun 30-da Baş nazir Nikol Paşinyanın qərarı ilə Karen Andreasyan Ermənistanın beynəlxalq hüquqi məsələlər üzrə nümayəndəsi təyin olunub.
Crossmedia.az xəbər verir ki, bu barədə Ermənistanın “Joğovurd” nəşri yazıb.
Nəşrə görə, Andreasyan konstitusion müstəqilliyə malik Ali Məhkəmə Şurasının sədri vəzifəsindən biabırçı şəkildə azad edilmişdi.
KİV bildirib ki, Yeğişe Kirakosyanı və Liparit Drmeyanı əvəzləyən Karen Andreasyanın bu təyinatı bir neçə baxımdan maraqlıdır.
“Məsələ təkcə Azərbaycanın əleyhinə qaldırılmış beynəlxalq iddialardan imtina etmək deyil (Kirakosyan bu etməkdən imtina etdi, Andreasyan isə edəcək), həm də onun dövlətin adından faktiki olaraq özünü müdafiə edəcəyidir.
Xatırladaq ki, ötən ilin noyabr ayına qədər Ali Məhkəmə Şurasının sədri olan Andreasyan bir sıra hakimlərin vəzifədən uzaqlaşdırılmasına təşəbbüs göstərmişdi. Vəzifədən uzaqlaşdırılan hakimlər isə Avropa İnsan Haqları Məhkəməsinə müraciət edərək, Andreasyanın addımlarının qanuniliyini mübahisələndirmişdilər. İndi isə beynəlxalq hüquqi məsələlər üzrə Ermənistanın nümayəndəsi qismində məhz Karen Andreasyan həmin işlər çərçivəsində ölkənin mövqeyini təqdim etməli və müdafiə etməlidir.
Bu hal təkcə hüquqi deyil, həm də etik müstəvidə müzakirə olunur. Faktiki olaraq elə bir vəziyyət yaranıb ki, keçmiş vəzifəli şəxsin qəbul etdiyi, beynəlxalq instansiyalarda azı qismən qanunsuz sayılan qərarlar indi elə həmin şəxs tərəfindən müdafiə olunmalıdır. Bu isə hüquqi müstəvidə artıq “maraqlar toqquşması” kimi qiymətləndirilir. Drmeyan işdən azad edildi, çünki o, komissiyaya “Elektrik Şəbəkələri” ilə bağlı çıxarılmış arbitraj qərarının yerinə yetirilməli olduğu barədə fikir bildirməyə cəsarət etmişdi.
Nikol Paşinyan isə bəyan edib: “Hökumət mənəm, kim mənimlə razı deyilsə, ya getməlidir, ya da mən onu uzaqlaşdıracağam”. Nəticədə o, Drmeyanı və daha bir neçə əməkdaşı vəzifədən kənarlaşdırdı”, - deyə müəllif bildirib.
13:05 16.09.2025
Oxunuş sayı: 950
