Fransada Makron hökumətinə qarşı kütləvi etirazlar keçirilib
Fransada prezident Emmanuel Makronun siyasətinə qarşı genişmiqyaslı etiraz aksiyaları keçirilib. Minlərlə insan küçələrə çıxaraq “Hər şeyi bloklayırıq” şüarı ilə yürüşlər edib. Ölkə üzrə 175 min nəfər 550 mitinq və 262 infrastruktur blokadasında iştirak edib. Təkcə Tuluz və Renn şəhərlərində 10 min nəfər, Marsel və Lionda 8 min, Monpelyedə isə 6 min insan aksiyalara qoşulub. Etirazların qarşısını almaq üçün hökumət 80 min polis qüvvəsini səfərbər edib, 540 nəfər saxlanılıb. Paris, Bordo, Morbihan və Orne bölgələrində isə dronlardan istifadə olunub.
Crossmedia.az xarici mediaya istinadən bildirir ki, etirazların əsas səbəbi sosial xərclərin ixtisar edilərək ordunun yenidən silahlandırılmasına və dövlət borcunun ödənilməsinə yönəldilməsi, həmçinin son iki ildə sayca beşinci dəfə yeni baş nazir təyin olunmasıdır. Emmanuel Makronun seçimi olan Sebastyan Lekornünün baş nazir postuna gətirilməsi cəmiyyətdə narazılıqları daha da artırıb.
Etirazlar zamanı jurnalistlər müxtəlif iştirakçılarla söhbət aparıblar. Parisdə tələbə Aleksandr bildirib ki, hökumət xalqı eşitmir: “Makron partiyasından gələn daha bir baş nazir – bu artıq son damladır”. O, vətəndaşların hüquqlarının təhdid altında olduğunu vurğulayıb. Paris nəqliyyat işçiləri Luk və Boris də narazılıqlarını dilə gətirərək vergilərin artdığını və işçi sinfinə təzyiqlərin gücləndiyini bildiriblər. Luk: “CAC 40 hökumətin dostlarıdır”, – desə, Boris əlavə edib: “Əgər yalnız yeyib yatırsansa, bu iş deyil, bu köləlikdir”.
Aksiyada iştirak edən tələbələr Emma və Eva isə seçkilərdə “Tabe olmayan Fransa” (LFI) partiyasını dəstəklədiklərini, lakin nəticədə yenə sağçı hökumətin formalaşdığını deyiblər. Onların sözlərinə görə, Fransa xalqı təmsil olunmur və hakimiyyət yalnız elitanın əlindədir. Teatr tələbəsi Bastien isə uzunmüddətli tətil çağırışında bulunaraq vurğulayıb: “Bir günlük aksiyalar kifayət deyil. İşçilər ölkəni ayaqda saxlayanlardır”. Kino tələbəsi Samuel vəziyyəti “absurd” adlandıraraq, yeni baş nazirin də eyni sistemdən gəldiyini bildirib: “Səsvermə heç nəyi dəyişmir, hakimiyyəti xalqın özü ələ almalıdır”. O, 80 min polis qüvvəsinin səfərbər olunmasını “faşizm” adlandırıb.
Samuel beynəlxalq həmrəyliyin vacibliyinə də diqqət çəkib: “Hətta Makron devrilsə belə, problemlər bütün dünyada qalır. Biz partiyalara və həmkarlar ittifaqlarına inanmırıq. İşçilərin özləri birləşməlidirlər – zibilyığanlar, aviadispetçerlər, hamı. Onlar olmadan sistem çökər”.
Məqalədə sonda qeyd olunub ki, Avropanın müxtəlif ölkələrində də işçilərin mübarizəsi güclənir. Sentyabrın 18-də Fransada ümummilli tətil planlaşdırılır. Gənclər həmkar işçilərlə birlikdə iqtisadiyyatdakı qənaət siyasətinə, müharibəyə və kapitalizmə qarşı aktiv fəaliyyətə çağırılır.
22:46 11.09.2025
Oxunuş sayı: 1481
