ABŞ konqresmenləri Bakıya gələcək - 907-ci düzəliş gündəmdədir - Deputatdan açıqlama
Azərbaycanın region və xarici dövlətlərlə qurduğu geniş siyasi əlaqələr dövlətimiz üçün yeni iqtisadi imkanlar açır və siyasi potensialını ortaya qoyur. Cənab Prezident İlham Əliyevin ABŞ-ə olan səfərindən sonra ABŞ və Azərbaycan münasibətlərində yeni səhifə açıldı. Belə ki, qurulan əməkdaşlıqlar hər iki tərəfin maraqlarını tam şəkildə ödəyir. Bu görüşdə əldə edilən razılaşmalar Cənubi Qafqaz regionuna sülh və sabitliyin gətirilməsi yolunda atılmış ən böyük addımdır. 907-ci düzəlişin ləğv edilməsi istiqamətində atılan addımlar, Azərbaycan Ermənistan arasında sülh müqaviləsi mətninin paraflanması region və dünya üçün olduqca əhəmiyyətli hadisədir. Hazırda 907-ci düzəlişin ləğvinin və Azərbaycan-Ermənistan münasibətlərinin normallaşma prosesinin sürətlənməsi üçün ABŞ konqresmenlərinin Azərbaycana gələcəyi gözlənilir.
Mövzu ilə bağlı Milli Məclisin deputatı Tural Gəncəliyev Crossmedia.az-a açıqlama verib: “8 avqust cənab Prezidentin Vaşinqtona səfəri və orda keçirilən görüşləri müdrik diplomatiyanın, xarici siyasətin ən yüksək səviyyədə təntənəsi idi. Bundan sonra biz gördük ki, ABŞ-Azərbaycan münasibətlərində yeni bir mərhələ başladı. ABŞ Azərbaycan arasında yeni ikitərəfli sənədlərin imzalanması, ABŞ-Azərbaycan-Ermənistan arasındakı üçtərəfli bəyanat münasibətlərdə yeni mərhələnin başladığını mesaj verən əsas amillərdir. Hazırda parlamentlər arasında da bu istiqamətdə münasibətlər gücləndirilir. Azərbaycan-ABŞ işçi qrupunun üzvü kimi mən də çox məmnunluqla parlament səviyyəsində ABŞ ilə münasibətlərin inkişaf etdirilməsinə öz məmnunluğumu bildirirəm. ABŞ konqresmenləri, senatorları 907-ci düzəlişin aradan qaldırılmasından sonra dəfələrlə Azərbaycana səfər ediblər. Bu səfərlər və münasibətlərimizin yeni mərhələyə qədəm qoyması sevindirici haldır”.
Ayhan
19:40 11.09.2025
Oxunuş sayı: 5036
