Gərginliyin aradan götürülməsi üçün Rusiya tərəfindən bir addımın atılması lazımdır -AÇIQLAMA
AZAL mülki təyyarəsinin Rusiya səmasında vurulmasından sonra Rusiya tərəfindən atılan nataraz addımlar Azərbaycan Rusiya münasibətlərini korlamaqda davam edir. Rusiyada yaşayan azərbaycanlılara qarşı həyata keçirilən təqiblər, müxtəlif iş adamlarına qarşı həyata keçirilən təzyiqlər münasibətləri gərgin olaraq saxlayır. Rusiya artıq regionda sözünü keçirə bilmir. Çinin Pekin şəhərində keçirilən hərbi paradda Rusiya Federasiyasının prezidenti Vladimir Putin açıqlamasında müəyyən problemlərin olduğunu bildirmiş, lakin bu problemlərin həlli ilə bağlı bir kəlmə də deməmişdir. Azərbaycan ictimaiyyətində belə bir fikir var ki, Azərbaycan münasibətlərin həll edilməsi üçün Rusiya tərəfindən addım gözləyir. Bəs bu nə qədər real görünür? Rusiyanın münasibətlərimizi yenidən bərpa etmək üçün atmalı olduğu addımı gerçəkləşdirəcəkmi?
Mövzu ilə bağlı deputat Hikmət Babaoğlu Crossmedia.az-a açıqlama verib: “Rusiya Azərbaycan münasibətləri öz ənənəvi məcrasına qayıtmalıdır. Çünki bunu hər iki ölkənin maraqları zəruri edir. Hadisələri gərginləşdirən səbəblər aradan qaldırılmalıdır ki, bu məsələlər də çox aydındır. Rusiya Azərbaycanın haqlı olduğunu və nə istədiyini çox gözəl bilir. Münasibətlərin gərginləşməsi Azərbaycana aid mülki təyyarənin Rusiya tərəfindən vurulması ilə başladı. Bundan sonrakı addımlarda bu gərginliyi artırdı. Münasibətləri gərginləşdirən addımlar da Rusiya tərəfindən atılıb. Rusiyada yaşayan azərbaycanlılara qarşı izləmələr, qanunsuz həbslər, insanların ölümünə səbəb cinayətlər baş verib. Azərbaycan diaspor liderlərinə, iş adamlarına qarşı təqiblər baş verib. Ona görə bu addımlar Rusiya tərəfindən atılmalıdır və Rusiya gec-tez bu addımları atmalı olacaq. Çünki Şanxay görüşündən sonra Rusiya federasiyasının prezidenti gərginlikdən daha üstün olan təməl maraqlardan danışdı. Belə olan halda Rusiyanın məsələlərin fərqində olduğunu görürük. Bu gərginliyin aradan götürülməsi üçün Rusiya tərəfindən bir addımın atılması bütün problemlərin həllinə gətirə bilər”.
Ayhan
17:37 10.09.2025
Oxunuş sayı: 670
