Səməd Seyidov: Bəhreyndə səfirliyimizin təsis edilməsi strateji əməkdaşlığın genişləndirilməsi üçün ciddi addımdır
Azərbaycanın xarici siyasət kursunda ərəb dünyası ilə əlaqələrin dərinləşdirilməsi prioritet istiqamətlərdən biridir. Bu baxımdan, Bəhreyn Krallığında səfirliyin təsis olunması təkcə diplomatik nümayəndəlik açmaq deyil, həm də strateji əməkdaşlığın genişləndirilməsi üçün ciddi addımdır.
Crossmedia.az xəbər verir ki, bu sözləri Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov komitənin iclasında müzakirəyə çıxarılan “Azərbaycan Respublikasının Bəhreyn Krallığında (Manama Şəhərində) səfirliyinin təsis edilməsi haqqında qanun layihəsini şərh edərkən deyib.
Komitə sədri qeyd edib ki, Azərbaycanın ərəb dünyası ilə, o cümlədən Körfəz ölkələri ilə münasibətləri son illərdə keyfiyyətcə yeni mərhələyə qədəm qoyub. Bəhreyn Krallığı ilə dostluq və qarşılıqlı hörmətə əsaslanan münasibətlərimiz qarşılıqlı faydalı əməkdaşlıq üçün böyük potensiala malikdir. Səfirliyimizin Manama şəhərində açılması bu münasibətlərin hüquqi və institusional bazasını gücləndirəcək, iqtisadi, mədəni və humanitar sahələrdə əməkdaşlığın genişlənməsinə təkan verəcək.
S.Seyidov diqqətə çatdırıb ki, bu təşəbbüs Prezident İlham Əliyevin rəhbərliyi ilə həyata keçirilən balanslaşdırılmış və çoxşaxəli xarici siyasətin məntiqi davamıdır. Azərbaycanın beynəlxalq nüfuzunun artdığı bir dövrdə, belə diplomatik təşəbbüslər ölkəmizin regionda və İslam dünyasında rolunu daha da gücləndirəcək.
Komitə sədri, həmçinin təklif olunan qanun layihəsinin Milli Məclisin plenar iclasında qəbul ediləcəyi təqdirdə, Azərbaycan ilə Bəhreyn arasında münasibətlərin daha dinamik və praktiki məzmun daşıyacağına inamını ifadə edib.
13:58 10.09.2025
Oxunuş sayı: 849
