Rusiya təyyarə qəzasına görə Azərbaycana kompensasiya ödəyib? - "Bazar söhbətidir"
2024-cü il dekabrın 25-də Qazaxıstanın Aktau şəhəri yaxınlığında baş verən “Azərbaycan Hava Yolları”na məxsus sərnişin təyyarəsinin qəzaya uğraması regionda və beynəlxalq aviasiya cəmiyyətində ciddi rezonans doğurdu. Təyyarədə 67 nəfər, o cümlədən Azərbaycan, Rusiya və Qazaxıstan vətəndaşları olub və qəza nəticəsində 38 nəfər həyatını itirib. Hadisədən sonra sığorta məsələləri də diqqət mərkəzinə gəlib; Rusiya Xarici İşlər Nazirliyinin açıqlamasına görə, təyyarəyə tam sığorta dəyəri – 1,003 milyard rubl məbləğində kompensasiya ödənilib və zərərçəkənlərin böyük hissəsi artıq bu ödənişləri alıb. Hadisə həm aviasiya təhlükəsizliyi, həm də beynəlxalq sığorta ödənişlərinin əhəmiyyətini bir daha gündəmə gətirib.
Azərbaycan Xarici İşlər Nazirliyindən isə bildirib ki, Azərbaycan Hava Yolları" (AZAL) aviaşirkətinə məxsus təyyarənin vurulması nəticəsində qəzaya uğraması ilə bağlı sığorta ödənişlərinin həyata keçirilməsi məsələsi ilə əlaqədar Rusiya Federasiyası Xarici İşlər Nazirliyi tərəfindən sentyabrın 4-də verdiyi açıqlama təəccüb doğurmaqla yanaşı, ictimaiyyəti çaşdırır.
Mövzu barədə Crossmedia.az-a danışan Milli Məclisin deputatı Elman Məmmədov bildirib ki, Rusiya tərəfi birmənalı olaraq dövlət səviyyəsində təzminat ödəməli və bunu beynəlxalq hüququn tələblərinə uyğun qəbul etməlidir:
"Yəni ödəniş olubsa, bu Rusiya dövləti tərəfindən rəsmi şəkildə məlum olmalıdır. Bu elə-belə bir bazar söhbəti deyil ki, necə ödəyiblər, nə vaxt ödəyiblər. Sənəd olmalıdır ortada. Hesab edirəm ki, bu məlumat düzgün deyil və Rusiya tərəfindən növbəti xoşagəlməz vəziyyətin yaranmasına səbəb olacaq. Bu, arzuolunmaz haldır. Arzuolunan odur ki, qonşu dövlətlər kimi, Rusiya ilə münasibətlərimiz yaxşılaşmağa doğru getsin, gərginlik azalsın. Azərbaycan bu siyasəti bu istiqamətdə qurub – qonşu dövlətlərlə sülh, mehribanlıq və əməkdaşlıq şəraitində yaşamaq".
Deputat əlavə edib ki, əgər Rusiya təyyarənin vurulması ilə bağlı məsuliyyəti qəbul etmirsə, bu artıq beynəlxalq aləmə məlum olan bir məsələdir və üzrxahlıqla yanaşı təzminat ödənilməlidir: "Rusiya dövlətlərarası münasibətlərdə beynəlxalq hüquqda qəbul olunmuş qayda-qanunları yerinə yetirsə. Bu onun imicinə heç bir xərər yetirmir. Sadəcə müstəqil dövlət olaraq biz haqqımızı tələb edirik. Əlavə heç nə istəmirik".
Mehriban Yariyeva
15:55 05.09.2025
Oxunuş sayı: 7599
