Uzaq şərqdə Çin, uzaq qərbdə ABŞ kimi böyük bir dövlət Azərbaycanla hesablaşırsa, deməli... - Parlamentari ilə müsahibə
Azərbaycanın beynəlxalq aləmdə artan nüfuzu və strateji əhəmiyyəti ölkəmizi qlobal səhnədə mühüm oyunçuya çevirib. Prezident İlham Əliyevin Çinə səfərləri və bu səfərlər çərçivəsində əldə edilən razılaşmalar Azərbaycan-Çin münasibətlərinin yeni səviyyəyə yüksəlməsinə və iqtisadi əməkdaşlığın dərinləşməsinə təkan verib. Əldə edilən əməkdaşlıqlar yeni iqtisadi imkanlar üçün şərait yaradır. Azərbaycan və Çin arasında əldə edilən razılaşmalar regionda bərpa edilən sabitlik və xüsusən Zəngəzur dəhlizi üçün önəmli mahiyyət daşıyır.
Milli Məclisin deputatı Jalə Əliyeva mövzu ilə prezident İlham Əliyevin Çinə səfəri, Çin-Azərbaycan münasibətləri ilə bağlı Crossmedia.az-a müsahibə verib:
- Prezident İlham Əliyevin Çin səfərini necə və əldə olunan nəticələri necə qiymətləndirirsiniz?
- Bu, İlham Əliyevin Çinə ilk səfəri deyil. Dövlət başçısı ötən bir neçə ay ərzində artıq ikinci dəfədir ki, Çinə səfər edir. Səfər çərçivəsində imzalanan əhəmiyyətli müqavilələr Azərbaycanı bölgənin fenomen dövlətlərindən birinə çevirir. Keçirilən görüşlər, əldə edilən əməkdaşlıqlar hər iki tərəfin iqtisadi maraqlarına cavab verir.
- Azərbaycan ABŞ ilə əlaqələrini inkişaf etdirərək Çinlə də əlaqələrə sadiq qalır. Bakının bu balanslı siyasətini necə qiymətləndirirsiniz?
- Azərbaycan dünyada və bölgədə yeritdiyi balanslı siyasəti ilə çox yüksək yer tutmaqdadır. Bu gün Azərbaycana olan ehtiram və Azərbaycanın nüfuzlu ölkə kimi qəbul edilməsi hər birimizin gözünün önündə baş verir. Bu yaxınlarda prezident İlham Əliyevin Vaşinqtona səfəri, ABŞ prezidenti Donald Trampla keçirdiyi görüşlər, əldə edilən razılaşmalar, Donald Trampın dilindən Azərbaycan və prezidentimiz haqqında səslənən fikirlər ölkəmizi fövqəl bir dövlət səviyyəsinə gətirib çıxarıb. Coğrafi, siyasi, iqtisadi mövqeyi və həyata keçirdiyi siyasət gündən-günə Azərbaycana strateji müttəfiq qazandırır. Uzaq şərqdə Çin kimi nəhəng bir dövlət, uzaq qərbdə ABŞ kimi böyük bir dövlət Azərbaycanla hesablaşırsa, əməkdaşlıq etmək istəyirsə, bu bizim böyük bir uğurumuzdur.
- Çinlə iqtisadi əlaqələr Azərbaycan üçün nələr vəd edir?
- Bu günlər Azərbaycanın sarsılmaz gələcəyinin təməllərinin atıldığı günlərdir. Biz bütün bu uğurlarımızla fəxr edirik. Artıq bütün dünya liderlərinin dilindən səsləndiyi kimi böyük liderlik xüsusiyyətinə malik olan İlham Əliyev Azərbaycanı çox irəliyə aparıb. Biz bundan sonra da çox əhəmiyyətli layihələrin həyata keçməsinin şahidi olacağıq. Azərbaycan da bu layihələrin əsas iştirakçısı və ev sahibi olacaq.
- Rəsmi Pekin Zəngəzur dəhlizinin açılmasına hansı töhfəni verə bilər?
- Bu gün Çinlə münasibətlərin bu səviyyəyə gəlməsi Zəngəzur dəhlizinin açılması üçün olduqca əhəmiyyətlidir. Zəngəzur dəhlizinin açılması bölgəyə və bölgədə iqtisadi layihələr həyata keçirən dövlətlərə böyük gələcək vəd edir.
Ayhan
12:12 03.09.2025
Oxunuş sayı: 15028
