İlham Əliyevin Çin səfəri: strateji tərəfdaşlığa yeni təkan - Deputat
Azərbaycan Prezidenti İlham Əliyev avqustun 30-da Çin Xalq Respublikasına səfər edib. Dövlət başçısı Tyançzində keçiriləcək Şanxay Əməkdaşlıq Təşkilatının (ŞƏT) Sammitində və Çin xalqının yapon işğalçılarına qarşı Müqavimət müharibəsi ilə Ümumdünya Faşizm üzərində qələbənin 80 illiyinə həsr olunmuş yubiley mərasimində iştirak edəcək. Səfər ikitərəfli və çoxtərəfli əməkdaşlığa yeni təkan verəcək, strateji tərəfdaşlıq münasibətlərini daha da gücləndirəcək.
Prezident İlham Əliyevin səfəri həm Azərbaycan-Çin əlaqələrinin möhkəmlənməsinə, həm də regionda sülh və əməkdaşlığın təşviqinə töhfə verəcək. Bu, həmçinin Azərbaycanın beynəlxalq platformalarda aktiv iştirakını göstərir və strateji tərəfdaşlıq mövqeyini gücləndirir.
Mövzu ilə bağlı Milli Məclisin deputatı Vüqar Rəhimzadə Crossmedia.az-a açıqlama verib.
O, İlham Əliyevin Qələbə Paradında iştirakının Azərbaycanın nüfuzunu təsdiqlədiyini bildirib:
“Prezident İlham Əliyevin Pekində keçiriləcək Qələbə Paradında iştirakı Azərbaycan və Çin arasında münasibətlərin yüksək səviyyəsinin göstəricisi olacaq. 3 sentyabrda keçiriləcək tədbirdə ümumilikdə 26 xarici ölkə liderinin iştirakı gözlənilir. Qələbə Paradı Pekinin Tyananmen meydanında təşkil ediləcək və Çin xalqının yapon işğalçılarına qarşı Müqavimət müharibəsində, həmçinin İkinci Dünya müharibəsində qələbəsinin 80-ci ildönümünə həsr olunacaq. Tədbir çərçivəsində genişmiqyaslı hərbi yürüş, Çin ordusunun müasir texnikalarının nümayişi və rəsmi mərasimlər keçiriləcək. Pekində keçiriləcək bu yubiley paradı beynəlxalq siyasi baxımdan da xüsusi əhəmiyyət daşıyır. Azərbaycan Prezidenti İlham Əliyevin də yüksək səviyyədə iştirak etməsi ölkəmizin beynəlxalq arenada nüfuzunun və Çinlə əlaqələrinin önəmini bir daha təsdiqləyir.
Getdikcə dərinləşən Azərbaycan–Çin strateji tərəfdaşlığı qlobal əməkdaşlığa çevrilir. Hazırda Azərbaycan beynəlxalq ictimaiyyət tərəfindən etibarlı tərəfdaş kimi qəbul edilir, qlobal güc mərkəzləri ilə siyasi və iqtisadi əlaqələrinin inkişafı əməkdaşlığın daha da genişləndirilməsi baxımından böyük önəm daşıyır. Bu baxımdan Çin Xalq Respublikası ilə Azərbaycanın yüksələn xətlə inkişaf edən əlaqələri diqqət mərkəzindədir. Çin öz növbəsində dünyanın fövqəldövləti kimi həm Şərq–Qərb, həm də Şimal–Cənub nəqliyyat marşrutlarının kəsişməsində yerləşən Azərbaycanla əməkdaşlığa böyük diqqət ayırır. Bu əməkdaşlıq yalnız iki ölkə arasında əlaqələrin möhkəmləndirilməsi ilə məhdudlaşmır, həm də regional və qlobal iqtisadi inteqrasiyanı gücləndirmək üçün mühüm amildir.
Azərbaycan ilə Çin arasında iqtisadi əlaqələrin genişlənməsi, həmçinin beynəlxalq təşkilatlar çərçivəsində fəaliyyətlərində də öz əksini tapıb. Şanxay Əməkdaşlıq Təşkilatı çərçivəsindəki birgə əməkdaşlıq, Azərbaycan–Çin Hökumətlərarası Ticarət–İqtisadi Əməkdaşlıq Komissiyasının fəaliyyəti, Asiya İnfrastruktur İnvestisiya Bankı ilə həyata keçirilən birgə layihələr və Azərbaycanın “Kəmər və Yol” təşəbbüsünə qoşulması bu əlaqələri daha da gücləndirib. Eyni zamanda, Şərq–Qərb və Orta Dəhliz layihələri çərçivəsindəki tərəfdaşlıqları nəqliyyat və ticarət əlaqələrinin inkişafına böyük töhfə verir.
Prezident İlham Əliyevin Qələbə Paradında iştirak etmək üçün Çin Xalq Respublikasına səfəri böyük tarixə malik olan, qarşılıqlı etimada və səmimiyyətə söykənən Azərbaycan–Çin əlaqələrinin inkişaf etməsinə, dövlətimizin beynəlxalq mövqeyinin daha da güclənməsinə müsbət təsir göstərəcək”.
Nicat Rüstəmzadə
17:57 30.08.2025
Oxunuş sayı: 1151
