Zəngəzur dəhlizinin açılması ilə Azərbaycanın öz ərazisindən Naxçıvana birbaşa boru xəttləri çəkiləcək
Azərbaycan və İran arasında Naxçıvana qaz nəqli ilə bağlı mövcud müqavilənin müddəti uzadılıb. SOCAR-ın məlumatına görə, tərəflər yeni razılaşma əldə edib və sənədin imzalanma prosesi davam edir.
Naxçıvanın qaz təchizatının davamlılığı üçün İranla müqavilənin uzadılması mühüm addımdır. Bu, həm muxtar respublikanın enerji təminatında fasiləsizliyi qoruyur, həm də gələcəkdə İğdır–Naxçıvan qaz kəmərinin işə düşməsi ilə əlavə şaxələnməni təmin edəcək.
Mövzu ilə bağlı iqtisadçı-ekspert Natiq Cəfərli Crossmedia.az saytına açıqlama verib.
O, həm Türkiyə, həm də İran üzərindən təminatın Naxçıvan üçün yaxşı hal olduğunu bildirib:
“Azərbaycanla İran arasında Naxçıvanın enerji təminatı ilə bağlı müqavilə 1990-cı və 2000-ci illərdən fəaliyyətdədir. Bizim İrana verdiyimiz qaz əvəzinə eyni həcmdə qazı İran Naxçıvana verirdi və artıq verdiyimiz qazın əvəzinə elektrik enerjisini Naxçıvana verir. Hələ ki, Türkiyə üzərindən Naxçıvana boru kəmərlərinin çəkilməsi davam edir. Ona görə də İran üzərindən Naxçıvana təminatla bağlı müqavilənin uzadılması doğru qərardır. Türkiyə üzərindən də Naxçıvanın təminatı məsələsi həll olunsa, yaxşı olar. Belə ki, alternativ, problem yaşanarkən biri digərini əvəz edən mənbələr olar. Gələcəkdə buna ümumiyyətlə ehtiyac qalmayacaq. Çünki Zəngəzur dəhlizinin açılması ilə Azərbaycanın öz ərazisindən Naxçıvana birbaşa boru xəttlərinin çəkilməsini müşahidə edəcəyik”.
Nicat Rüstəmzadə
12:41 27.08.2025
Oxunuş sayı: 991
