Türkiyədə Qars-İğdır-Aralıq-Diluçu dəmir yolunun təməli qoyuldu
Türkiyədə Qars-İğdır-Aralıq-Diluçu dəmir yolu xəttinin təməlqoyma mərasimi keçirilib. Tədbirdə çıxış edən Türkiyənin nəqliyyat və infrastruktur naziri Abdulkadir Uraloğlu layihənin region üçün strateji əhəmiyyətini vurğulayıb.
Crossmedia.az xəbər verir ki, bu barədə Haber Global məlumat yayıb.
Yeni dəmir yolu xətti Zəngəzur dəhlizinin əsas hissəsi kimi Türkiyə ilə Azərbaycan arasında Naxçıvan üzərindən birbaşa əlaqəni təmin edəcək. Bununla da, Orta Dəhlizin Çindən Avropaya qədər uzanan nəqliyyat yolunun mühüm elementinə çevriləcək.
224 kilometr uzunluğunda, elektrikləşdirilmiş və ikixətli olacaq dəmir yolu hər il 15 milyon ton yük və 5,5 milyon sərnişin daşımaq gücünə malikdir. Layihənin reallaşması Türkiyənin şərq bölgələrinin ixrac potensialını artıracaq, Transxəzər və Şimal–Cənub nəqliyyat dəhlizlərini gücləndirəcək, həmçinin ticarət və turizm əlaqələrini inkişaf etdirəcək.
Dəyəri 2,4 milyard avro (təxminən 4,5 milyard manat) olan layihə Türkiyə Maliyyə Nazirliyinin dəstəyi ilə həyata keçirilir. İnşaat çərçivəsində onlarla tunel, körpü və keçidin tikintisi nəzərdə tutulur.
Nigar Rəhimova
21:23 22.08.2025
Oxunuş sayı: 1553
