NATO-dan Ukraynaya 1,5 milyard dollarlıq yeni silah yardımı
Son bir ay ərzində NATO üzvü olan dövlətlər ABŞ-dan alınmış 1,5 milyard dollarlıq silahı Ukraynaya təhvil verib və bu proses davam edir.
Crossmedia.az xəbər verir ki, bu barədə NATO Baş katibi Mark Rutte Ukrayna Prezidenti Vladimir Zelenski ilə birgə mətbuat konfransında çıxışı zamanı bildirib.
O həmçinin NATO-nun dəstəyinin dəyişməz olduğunu və getdikcə artdığını bildirib:
“Dəstəyimiz sarsılmazdır və artır. Bu dəstəyə NATO müttəfiqlərinin maliyyələşdirdiyi, ABŞ istehsalı ölümcül silahların Ukraynaya çatdırılmasını təmin edən yeni Prioritetləşdirilmiş Ukrayna Tələbləri Siyahısı da daxildir. Bir ay ərzində bu siyahı çərçivəsində Ukraynaya əlavə olaraq 1,5 milyard dollar dəyərində vacib avadanlıq, hava hücumundan müdafiə vasitələri, sursat və digər texnika göndərilib. Yeni paketlər də hazırlanır”, – Rutte qeyd edib.
Onun sözlərinə görə, alyans müharibədən sonra Ukrayna ordusunun sayını artırmağı və Kiyev nəzarətində olan ərazilərdə yeni müdafiə istehsal müəssisələrinin yaradılmasını planlaşdırır.
Nihat Tahirov
18:55 22.08.2025
Oxunuş sayı: 5955
