Azərbaycan qazı Suriya xalqına işıq gətirəcək - Türkiyənin vitse-prezidenti
Türkiyənin vitse-prezidenti Cevdət Yılmaz bildirib ki, Azərbaycan qazı hesabına hasil olunan elektrik enerjisi Suriya xalqına uzun illər gözlədiyi işığı verəcək. O, bu barədə avqustun 20-də Ankarada SOCAR-la Türkiyənin ODTÜ universitetinin birgə həyata keçirdiyi “Cep Kitapları” sosial layihəsinin təqdimatında çıxış edib.
Crossmedia.az xarici mediaya istinadən bildirir ki, Yılmaz, illərdir Bəşər Əsəd rejiminin təzyiqi altında əziyyət çəkən suriyalıların problemlərinin həllində bu addımın mühüm rol oynayacağını vurğulayıb. Onun sözlərinə görə, Azərbaycan qazının Suriyaya çatdırılması Ankara və Bakı arasında sıx əməkdaşlıq və koordinasiyanın nəticəsində mümkün olub.
Vitse-prezident əlavə edib ki, iki qardaş ölkə arasındakı əməkdaşlıq regionun enerji təhlükəsizliyini təmin edən əsas amillərdəndir. O, Bakı–Tbilisi–Ceyhan, Bakı–Tbilisi–Ərzurum və TANAP layihələrinin əhəmiyyətini xatırladaraq, SOCAR-ın Türkiyəyə yatırımlarının 18 milyard dollardan artıq olduğunu və bununla da şirkətin ölkədə aparıcı xarici investor mövqeyini möhkəmləndirdiyini bildirib.
Zəhra Ağayeva
19:02 20.08.2025
Oxunuş sayı: 7854
