Makron: " Növbəti iki həftə Ukraynanın təhlükəsizlik zəmanətlərinin razılaşdırılması üçün həlledici olacaq"
Vaşinqtonda keçirilmiş sülh danışıqlarından sonra qarşıdakı iki həftə Ukraynanın təhlükəsizlik zəmanətlərinin razılaşdırılması baxımından həlledici rol oynayacaq. ABŞ-la aparılan müzakirələrin yekunlaşdırılması üçün 15 gün çox önəmlidir.
Crossmedia.az xəbər verir ki, bu barədə Fransa Prezidenti Emmanuel Makron LCI telekanalına müsahibəsində danışıb. O qeyd edib ki, Ağ Evdə keçirilən görüşlərdən və Alyaskada ABŞ Prezidenti Donald Tramp ilə Rusiya lideri Vladimir Putin arasında aparılan danışıqlardan sonra müttəfiqlər yeni təhlükəsizlik formatları üzərində işləməyə hazırdırlar.
“Son günlərin ən böyük dəyişikliklərindən biri odur ki, Prezident Tramp Ukraynanın təhlükəsizliyinin təmin edilməsinin zəruriliyini qəbul etdi”, – Fransa lideri vurğulayıb.
Makronun sözlərinə görə, Fransa, Böyük Britaniya, Almaniya və Türkiyə kimi tərəfdaş ölkələr havada, dənizdə və quruda “sakitləşdirici əməliyyatlar” keçirməyə hazırdırlar, lakin bu, ön xəttdə baş verməyəcək.
Eyni zamanda Makron həddindən artıq tələskənlik və Kreml mövqeyi ilə bağlı illüziyaların təhlükəli olduğunu diqqətə çatdırıb. O bildirib ki, gələcək saziş Ukraynanın ərazi bütövlüyünün bərpasını və yeni təcavüzün qarşısının alınmasını təmin etməlidir.
Nihad Tahirov
12:50 20.08.2025
Oxunuş sayı: 773
