Şuşa forumu: Prezident İlham Əliyevin mesajları Cənubi Qafqaz üçün yol xəritəsi təqdim edir
Prezident İlham Əliyevin III Şuşa Qlobal Media Forumunda səsləndirdiyi fikirlər Cənubi Qafqazın sülh və sabitlik məkanına çevrilməsi zərurətini bir daha gündəmə gətirdi. Azərbaycan Prezidentinin çıxışı bir tərəfdən regionun yeni geosiyasi reallıqlarını təsvir edirdisə, digər tərəfdən gələcək perspektivlərə işıq salırdı. Forum, sözün əsl mənasında, Azərbaycanın beynəlxalq media və informasiya siyasəti ilə yanaşı, regional liderliyini də ortaya qoydu.
Azərbaycanın müdrik və uzaqgörən siyasəti təkcə öz milli maraqlarını deyil, bütövlükdə regionun gələcəyini düşünən bir yanaşma ilə formalaşdırılıb. Prezidentin çıxışında diqqətçəkən əsas məqam – Cənubi Qafqazda uzunmüddətli sülhün yalnız regional əməkdaşlıq və qarşılıqlı etimad əsasında mümkün ola bilməsi fikri idi. Bu, həm Gürcüstan, həm də Ermənistan üçün ciddi çağırışdır: ya Azərbaycanın yaratdığı əməkdaşlıq mühitinə qoşulmaq, ya da regionda təcrid riski ilə üz-üzə qalmaq.
Mövzu ilə bağlı Crossmedia.az-a açıqlama verən Milli Məclis deputatı Anar İsgəndərov bildirib: “Forum bir daha göstərdi ki, Azərbaycan artıq Cənubi Qafqazın lider dövlətidir. Ölkəmiz tarixində ilk dəfə olaraq Qərb dövlətlərinə enerji ixrac edir. Eyni zamanda, Mərkəzi Asiya ölkələri ilə dostluq və qardaşlıq münasibətlərini ən yüksək səviyyəyə çatdırıb”.
Deputatın sözlərinə görə, Cənubi Qafqazda sabitliyin təmin olunması yalnız regional dövlətlərin — o cümlədən Ermənistan və Gürcüstanın — Azərbaycanın mövcud maraqlarını və regional liderliyini qəbul etməsi ilə mümkündür. Bu fikirlər “Qafqaz evi” ideyasına birbaşa bağlıdır. Tarix boyu arzulanan bu model artıq real siyasi gündəmə çevrilib və əsas tezis belədir: Qafqazın problemləri Qafqaz daxilində, Qafqaz xalqları tərəfindən həll olunmalıdır.
“Artıq gürcülər və ermənilər dərk edirlər ki, şimaldan isti külək əsə bilməz. Şimal sərt və amansızdır, heç kəsə rəhm etmir. Eyni zamanda, Qərb nə qədər səmimi görünməsinə baxmayaraq, öz maraqlarını güdür,” – deyə deputat əlavə edib.
O, Azərbaycanın siyasətinin həm Gürcüstan, həm də Ermənistan üçün nümunə olduğunu qeyd edib. Gürcüstanın artıq bu nümunəni qəbul etdiyini və münasibətləri qarşılıqlı hörmət üzərində qurduğunu xüsusi vurğulayıb. Eyni yanaşmanın Ermənistandan da gözlənildiyini bildirib.
Ən mühüm məqamlardan biri isə Azərbaycanın Ermənistanla sülh müqaviləsi bağlamaq təşəbbüsünün açıq və şəffaf şəkildə davam etməsidir. Deputat bu xüsusda bildirib: “Azərbaycanın bu müqaviləyə iki əsas şərti var. Əgər 2026-cı ilə qədər bu şərtlər yerinə yetirilərsə, bölgədə sülh, əmin-amanlıq və inkişaf yolu açılacaq.”
44 günlük Vətən müharibəsinin nəticələrinin həm dərs, həm də ibrət olduğunu xatırladan deputat, Azərbaycanın prinsipial mövqeyinin – yəni torpaqlarını qorumaq və inkişaf etdirmək – bütün region dövlətləri üçün strateji bir modelə çevrildiyini bildirib.
Mehriban Yariyev
12:53 21.07.2025
Oxunuş sayı: 8563
