Muhaysini Suriyanın yeni liderinin Suveydadan geri çəkilmə qərarını dəyərləndirdi
Əslən Səudiyyə Ərəbistanından olan keçmiş “Əl-Qaidə” üzvü, HTŞ-nin rəhbərlik etdiyi “Fəth ordusu” komandirlərindən biri olmuş, şəriət üzrə məsul şəxs olan doktor Şeyx Abdullah əl-Muhaysini Suriyanın yeni lideri Əhməd əş-Şaraanın Suveydadan geri çəkilmə qərarını şərh edib:
“Vaxtında verilmiş bir geri çəkilmə qərarı, cəsur və azad bir komandir üçün irəliləmə qərarından daha ağır ola bilər”.
”Buna görə də, Rəsulullah sallallahu əleyhi və səlləm, Xalid’in Mütə günündəki addımını ‘fəth’ adlandırmışdır”.
Crossmedia.az xəbər verir ki, Mütə döyüşü, müsəlmanlarla Bizans imperiyası və onun ərəb müttəfiqi Qəssanilər arasında, indiki İordaniya ərazisində baş vermişdir.
Döyüşün səbəbi, Məhəmməd peyğəmbərin (s.ə.s) göndərdiyi elçinin Qəssanilər tərəfindən öldürülməsi idi. Bu hadisəyə cavab olaraq, təxminən 3.000 nəfərlik İslam ordusu həmin bölgəyə göndərildi.
Orduya komandan kimi Zeyd ibn Harisə, Cəfər ibn Əbu Talib və Abdullah ibn Rəvahə təyin olunmuşdu. Lakin bu üç komandan döyüşdə şəhid oldu.
Komandanlığı öz üzərinə götürən Xalid ibn Vəlid, düşmən qüvvələrinin sayca çox üstün olduğunu görüb birbaşa döyüşmək əvəzinə, ordu düzülüşünü dəyişdirərək düşməni aldadıb, taktiki geri çəkilmə ilə ordunu xilas etdi.
Məhəmməd peyğəmbər (s.ə.s) bu addımı məğlubiyyət kimi deyil, əksinə, “fəth” (qələbə) kimi qiymətləndirdi və Xalidə “Allahın Qılıncı” (Seyfullah) ünvanını verdi.
04:39 18.07.2025
Oxunuş sayı: 7607
