Dəməşqdə kritik SDG-Suriya hökuməti görüşü: ABŞ və Fransa da iştirak edib
Bu gün Dəməşqdə Suriya hökuməti ilə PYD/SDG rəhbərliyi arasında yüksək səviyyəli görüş keçirilib. Görüşdə SDG komandanı Məzlum Abdi və Suriya xarici işlər naziri Əsəd Əl-Şəbani başçılıq etdikləri nümayəndə heyətləri ilə iştirak ediblər. Toplantıya ABŞ və Fransa nümayəndələri də qatılıb.
Crossmedia.az bildirir ki, görüşdə tərəflər arasında həssas və strateji məsələlər müzakirə edilib. Əsas gündəm mövzuları SDG (YPG) üzvlərinin Suriya Milli Ordusuna inteqrasiya mexanizmi, sərhəd keçidlərinin və qaçqın düşərgələrinin idarə olunması, eləcə də həbsxanalarda saxlanılan İŞİD üzvlərinin siyahısı olub.
SDG nümayəndə heyəti təşkilatın üç il ərzində vahid orduya birləşməsi və mərhələli şəkildə qoşulması şərtində israr edib. Lakin YPG rəhbərliyi Rakka və Deyr əz-Zorun nəzarətini dərhal təhvil verməkdən imtina edib. Bu isə Suriya və Türkiyə hökumətləri tərəfindən kəskin etirazla qarşılanıb və hər hansı gecikmənin qəbuledilməz olduğu bildirilib.
ABŞ və Fransa nümayəndələrinin iştirakı ilə keçirilən görüş zamanı Suriya hökuməti razılaşmanın ləngiməsinə görə açıq şəkildə Məzlum Abdini ittiham edib. SDG rəhbəri isə Rakka və Deyr əz-Zor məsələsində qərar vermək üçün Qəndildəki rəhbərliklə əlavə məsləhətləşmələrə ehtiyac duyduğunu bildirib. Bununla belə, Suriya hökuməti yeni vaxt tələbinin qəbul edilməyəcəyini bəyan edib.
Mehriban Yariyeva
14:37 10.07.2025
Oxunuş sayı: 874
