Azərbaycanla Ermənistan ikitərəfli danışıqları və etimad quruculuğu tədbirlərini davam etdirmək barədə razılığa gəlib - XİN
Birləşmiş Ərəb Əmirliklərinin Əbu-Dabi şəhərində iyulun 10-da Azərbaycan Prezidenti və Ermənistanın Baş naziri arasında görüş keçirilib və Azərbaycan-Ermənistan dövlətlərarası normallaşma gündəliyinin müxtəlif aspektləri müzakirə edilib.
Crossmedia.az xəbər verir ki, bu barədə Azərbaycan Xarici İşlər Nazirliyinin görüşün yekunlarına dair yaydığı mətbuat məlumatında qeyd olunub.
Məlumata görə, ikitərəfli danışıqların normallaşma prosesi ilə bağlı bütün məsələlərin həlli üçün ən səmərəli format olduğu təsdiqlənib və bu əsasda belə nəticəyönümlü dialoqun davam etdirilməsi razılaşdırılıb.
Bildirilib ki, sərhədin delimitasiyası prosesi ilə bağlı əldə olunmuş nailiyyətləri dəyərləndirən liderlər bu istiqamətdə əməli işlərin davam etdirilməsi üçün müvafiq dövlət komissiyalarına tapşırıqlar veriblər.
Tərəflər həmçinin iki ölkə arasında ikitərəfli danışıqları və etimad quruculuğu tədbirlərini davam etdirmək barədə razılığa gəliblər.
Azərbaycan Prezidenti və Ermənistanın Baş naziri Birləşmiş Ərəb Əmirliklərinin Prezidenti Əlahəzrət Şeyx Məhəmməd bin Zayed Al Nəhyana səmimi qonaqpərvərliyə və ikitərəfli görüşün təşkilinə görə təşəkkür ediblər.
14:54
Azərbaycan Prezidenti İlham Əliyev ilə Ermənistanın Baş naziri Nikol Paşinyan arasında keçirilən son görüş çox konstruktiv və müsbət atmosferdə baş tutub.
Crossmedia.az bildirir ki, görüş zamanı Azərbaycan-Ermənistan münasibətlərinin gələcəyini müəyyən edən əsas istiqamətlər üzrə geniş müzakirələr aparılıb. Söhbət, ilk növbədə, sərhədlərin delimitasiyası, uzun illərdir gərginliyə səbəb olan Zəngəzur dəhlizinin açılması və inkişafı, eləcə də sülh sazişinin imzalanmasına hazırlıq məsələlərindən gedir. Bu mövzularda aparılan müzakirələr dərin və məzmunlu xarakter daşıyıb ki, bu da tərəflərin danışıqlar prosesində yeni mərhələyə keçdiyini göstərir.
Qeyd edək ki, görüş yalnız mövqelərin rəsmi mübadiləsi ilə məhdudlaşmayıb. Tərəflər arasında real fikir və təklif mübadiləsi aparılıb. Bu, ortaq nöqtələrin və mövcud fikir ayrılıqlarının daha aydın şəkildə müəyyənləşdirilməsinə imkan verib.
Nəticə etibarilə, həm texniki səviyyədə - ixtisaslaşmış işçi qrupları çərçivəsində, həm də daha yüksək siyasi səviyyələrdə təmasların davam etdirilməsi barədə ümumi razılıq əldə olunub.
15:08 10.07.2025
Oxunuş sayı: 1000
