Xaricdə təhsil alan vətəndaşlarımız bunu etməsələr vaxt və maddiyyat itkisi yaşayacaq – XƏBƏRDARLIQ
Müasir dövrdə qloballaşmanın təsiri ilə gənclər arasında xaricdə təhsil almaq tendensiyası daha da aktuallaşıb. Lakin bu proses yalnız arzu və istəklə kifayətlənmir. Doğru seçim etmək, gələcəkdə diplomun tanınması və əmək bazarına inteqrasiya baxımından xüsusi əhəmiyyət daşıyır. Xaricdə təhsil almağı planlaşdıran hər bir vətəndaş üçün sistemli yanaşma, düzgün istiqamətləndirmə və rəsmi tələblərin nəzərə alınması olduqca vacibdir.
Mövzu ilə bağlı təhsil eksperti Elçin Əfəndiyev Crossmedia.az-a açıqlama verib: “Attestatla xaricdə təhsil almağa gedən hər bir vətəndaş əvvəlcə geniş araşdırma aparmalıdır. Bu zaman Təhsildə Keyfiyyət Təminatı Agentliyinin saytına daxil olaraq baxmalıdır ki, hansı universitetlərin diplomları tanınır, hansı ixtisaslar ölkəmiz üçün prioritetdir. Bu araşdırma prosesindən sonra müraciət etməlidir. Bundan əlavə, əyani təhsilə üstünlük verilməlidir. Çünki distant və qiyabi təhsil ölkəmizdə tanınmır. Vətəndaş hansı universiteti seçirsə və hansı şirkətlə əməkdaşlıq edirsə, yerləşmə və sənədləşməyə diqqət etməlidir. Ümumilikdə isə İT və iqtisadiyyat yönümlü ixtisaslara diqqət yetirilməlidir. Ölkə olaraq isə qonşu dövlətimiz, qardaş Türkiyə və Avropa ölkələrinin bir çoxu seçim ola bilər. Bayaq da qeyd etdiyim kimi, əgər xaricdə təhsil alan vətəndaş qiyabi və distant təhsil alırsa, o həm vaxt, həm də maddi itki yaşayacaq”.
Ayhan
16:40 04.07.2025
Oxunuş sayı: 850
