İxtisası şəxsi maraqlar yox, əmək bazarındakı reallıqlar əsasında seçin- Ekspert tələbələrə səsləndi
Magistraturaya ixtisas seçimi zamanı əmək bazarının tələbləri əsas götürülməlidir – Təhsil eksperti
İyulun yeddisindən 13-dək Azərbaycanda ali təhsilin magistratura pilləsi üzrə ixtisas seçimi mərhələsi keçiriləcək. Bu mərhələdə bakalavrlar gələcək karyeralarını müəyyənləşdirəcək ixtisasları seçəcəklər.
Məlum olduğu kimi, ixtisas seçimi kifayət qədər ciddi və məsuliyyətli məsələdir. Təəssüf ki, bəzən tələskənlik, bəzən də kənar müdaxilə nəticəsində yanlış seçim edə bilirik.
Təhsil eksperti İlqar Orucov Crossmedia.az-a açıqlamasında ixtisas seçimi ilə bağlı tələbələrə müəyyən tövsiyələr verdi: “Bu seçim təsadüfi deyil, əmək bazarının reallıqları və şəxsi maraqlar nəzərə alınmaqla edilməlidir. İxtisas seçimi edən bakalavrlar mütləq şəkildə əmək bazarının tələblərini nəzərə almalıdırlar. İxtisas seçimi zamanı bakalavrlar gələcək əmək bazarında yer ala biləcək ixtisaslara önəm verməlidirlər. Bu, olduqca vacibdir. Artıq bakalavr pilləsini başa vurmuş gənclər kifayət qədər məlumatlı və bilikli olurlar. Hesab edirəm ki, onlar əmək bazarının tələblərini düzgün qiymətləndirmək imkanına sahibdirlər və bu məsələyə ciddi yanaşmalıdırlar. Seçilən ixtisas, magistratura təhsili alacaq gəncin gələcək həyatında mühüm rol oynayır. Təhsili nə üçün alırıq? Əlbəttə, sabah həmin ixtisas üzrə çalışmaq, iş tapmaq və karyera qurmaq üçün. Bu baxımdan, ixtisas seçimi zamanı təkcə əmək bazarını yox, həm də şəxsi maraqları, istəkləri əsas götürmək vacibdir”.
Ekspertin fikrincə, yalnız başqasının istəyi ilə ixtisas seçmək, gələcəkdə uğursuz nəticələrə gətirib çıxara bilər: “Əgər bir gənc öz arzusuna uyğun olmayan bir ixtisası təkcə kiminsə istəyinə görə seçirsə, bu, gələcəkdə həm də uğursuz kadr olmaq deməkdir. Peşəkar mütəxəssis kimi yetişmək üçün gərək insanın özü seçdiyi sahəyə maraqlı olsun. Bu maraq olmadan uğur qazanmaq çətin olar, magistratura pilləsi daha dərin biliklər əldə etməyə imkan yaradır və bu fürsəti düzgün dəyərləndirmək lazımdır. Magistratura təhsili gənclərə ixtisasları üzrə daha dərin biliklər əldə etmək imkanı verir. Əminəm ki, gənclərimiz bu fərqi anlayırlar. Onlar bu mərhələdə qazandıqları bilikləri dəyərləndirməklə həm öz gələcəklərinə, həm də ölkənin inkişafına töhfə verə bilərlər”.
Sonda ekspert bakalavrlara tövsiyə edib ki, seçimlərini şəxsi maraqlar, əmək bazarının reallıqları və uzunmüddətli planlama üzərində quraraq etsinlər: “İxtisas seçərkən yalnız şəxsi istəklərə yox, eyni zamanda əmək bazarının tələblərinə də uyğun addım atmaq lazımdır. Doğru planlama və doğru seçim gələcək uğurların əsasını qoyur”.
Mehriban Yariyeva
20:26 03.07.2025
Oxunuş sayı: 805
