"Düşünürsən ki, döyəcəklər?" ADMİU səhnəsində
Azərbaycan Dövlət Mədəniyyət və İncəsənət Universitetində SABAH qruplarının Rejissorluq fakültəsi üzrə III kurs tələbəsi Nuray Musazadənin rejissorluğu ilə Matey Vişnekin “Düşünürsən ki, döyəcəklər?” əsəri səhnələşdirilib.
Yazıçının qeyd etdiyinə görə, əsərdə iki obraz var idi: Birinci şəxs və İkinci şəxs. Birinci şəxs – Məhəmməd Gülmalıyev – qorxu içərisində güclü olmağa çalışan biri kimi təqdim olunur. Rejissorun yozumuna görə, bu obraz bir bəstəkar idi və məhdudiyyət, zindan, əzab, ilham axtarışı ilə daxili boğulma yaşayır, bütün bu duyğularla yalnız yuxularında üzləşməyi bacarırdı.
İkinci şəxs – Oksana Yüzbaşıyeva – sakit, mülayim və bəlkə də sehirli idi. Bəstəkarın – yəni birinci şəxsin – axtardığı o notlar bir qadın formasında yuxusuna daxil olur və həmin qadın ikinci şəxsə çevrilir. O, bəstəkarın qorxuları ilə üzləşməsinə yardım edir, sanki əvvəldən bunun üçün hazırlanmışdı.
Epizodik rollarda Gülnar Hüseynova və Maqsud Rzayev çıxış edirdi. Bu obrazlar rejissorun quruluşuna əsasən əsərə əlavə olunmuşdu. Gülnar Hüseynovanın ifa etdiyi “Zəncir qadın” tez-tez səhnəyə çıxaraq ikinci şəxsin yumşaltdığı əhval-ruhiyyəni gərginləşdirirdi. Bu obraz əslində bəstəkarın içindəki təlatüm və narahatlığı təcəssüm etdirirdi. Maqsud Rzayev isə uşaq obrazında birinci şəxsin uşaqlığını canlandırırdı.
Tamaşa 01 iyul 2025-ci il tarixində universitetin böyük səhnəsində nümayiş olunub. Bu əsərə Azərbaycan Dövlət Mədəniyyət və İncəsənət Universitetində ilk dəfə məhz Nuray Musazadə tərəfindən quruluş verilib. Azərbaycanda isə “Düşünürsən ki, döyəcəklər?” əsərinə ilk dəfə 2014-cü il avqustun 23-də ODA Teatrında səhnə həyatı verilib. Həmin tamaşada Elmin Bədəlov, Həsənağa Məmmədov, Nihad Qulamzadə, Murad Rüstəm, Günay İlyasova və Niyazəli Məmmədzadə kimi aktyorlar çıxış etmişdilər.
Rejissor Nuray Musazadənin işi onun qrup rəhbəri, Əməkdar incəsənət xadimi Hafiz Quliyev, ustadı Gümrah Ömər və SABAH qruplarının rəhbəri, Əməkdar artist Nofəl Vəliyev tərəfindən maraq və rəğbətlə qarşılanıb.
Tamaşada rejissorun fərqli yanaşması, simvolik quruluş həlli və tələbələr tərəfindən sərgilənən peşəkar aktyor oyunu xüsusilə seçilib.
Ayan Sədi
21:45 02.07.2025
Oxunuş sayı: 14214
