Ərdoğan və Tramp NATO sammitində görüşdü
Haaqada keçirilən NATO sammiti çərçivəsində Türkiyə Prezidenti Rəcəb Tayyib Ərdoğan və ABŞ Prezidenti Donald Tramp arasında görüş baş tutub. Görüş barədə məlumatı Türkiyə Prezident Administrasiyası yayıb.
Crossmedia.az xarici mediaya istinadən bildirir ki, liderlər arasında keçirilən görüşdə iki ölkə arasında ikitərəfli münasibətlərlə yanaşı, regional və beynəlxalq məsələlər də müzakirə olunub. Ərdoğan İsrail ilə İran arasında atəşkəsin əldə olunmasına görə ABŞ Prezidentinin səylərini yüksək qiymətləndirib. Türkiyə Prezidenti həmçinin Qəzza zolağında davam edən “humanitar fəlakətin” tezliklə aradan qaldırılması və Rusiya ilə Ukrayna arasında sülhün bərqərar olunması üçün fəal dialoqun vacibliyini vurğulayıb.
İkitərəfli əlaqələrə toxunan Ərdoğan Türkiyə və ABŞ-ın enerji və investisiya daxil olmaqla müxtəlif sahələrdə əməkdaşlığı inkişaf etdirmək üçün geniş imkanlara malik olduğunu bildirib. O, həmçinin müdafiə sənayesi sahəsində əməkdaşlığın dərinləşdirilməsinin iki ölkə arasında ümumi ticarət dövriyyəsinin 100 milyard dollaradək artırılması hədəfinə töhfə verə biləcəyini qeyd edib.
Fatimə Nəbiyeva
10:20 25.06.2025
Oxunuş sayı: 8902
