İsrail Qəzzədə yardım gözləyən insanlara atəş açdı: Ən azı 44 ölü var
İsrail ordusunun Qəzzanın cənub və mərkəzində yardım gözləyən insanlara atəş açması nəticəsində azı 44 nəfər həlak olub. Hadisə şahidlərinin və səhiyyə mənbələrinin bildirdiyinə görə, çox sayda insan yaralanıb, ölənlərin sayının artacağı istisna edilmir.
Crossmedia.az xarici mediaya istinadən bildirir ki, çərşənbə axşamı günü səhər saatlarında İsrail əsgərləri yardım maşınlarına yaxınlaşan insanlara atəş açıb. Nəticədə Nuseyratdakı Avda Xəstəxanasına 25 meyit və 146 yaralı gətirilib. Yaralılardan 62-nin vəziyyəti ağırdır. Eyni hücum zamanı Deyr əl-Bəlahda yerləşən Əl-Əqsa Şəhidləri Xəstəxanası da 6 meyit qəbul edib. Refah ərazisində də yardıma getməyə çalışan insanlara atəş açılıb. Nəticədə azı 19 nəfər ölüb, 50 nəfər yaralanıb.
Hadisənin baş verdiyi Netzarim dəhlizi yaxınlığında İsrail ordusu araşdırmalara başladığını bildirib. Bu dəhliz Qəzzanın şimal və cənub hissələrini ayırır. Hadisəni görən şahidlərindən Əhməd Həlavə hücumu “tam bir qətliam” adlandırıb. Hossam Əbu Şəhada isə ərazidə tank və dronlarla atəş açıldığını deyib.
Yardım bölgəsində baş verən hadisə ilə bağlı hələlik İsrail ordusu rəsmi açıqlama yaymayıb. Ordunun bəzi şəxslərin şübhəli şəkildə yaxınlaşdığını əsas gətirərək “xəbərdarlıq atəşi” açdığını bildirməsinə baxmayaraq, hadisə şahidlərinin dedikləri bunun əksini göstərir.
Qəzza Humanitar Yardım Fondunun yaydığı məlumata əsasən, çərşənbə axşamı günü saat 10-da açılan yardım məntəqəsi daha sonra bağlanıb və insanlara əraziyə getməmələri tövsiyə olunub. Bu fondun fəaliyyətinə ABŞ administrasiyası tərəfindən 30 milyon dollar ayrıldığı qeyd olunur. Fondun mərkəzləri İsrail nəzarətindədir və müstəqil jurnalistlərin girişinə icazə verilmir.
Qeyd edək ki, oktyabrın əvvəlində başlayan müharibədən bəri Qəzzada ölənlərin sayı 56 mini keçib. Qəzza Səhiyyə Nazirliyi bildirir ki, ölənlərin yarıdan çoxu qadın və uşaqlardır. Təxminən 2,3 milyon əhalinin hamısı yerindən didərgin düşüb, ərazi isə kəskin aclıqla üz-üzədir.
Fatimə Nəbiyeva
09:52 25.06.2025
Oxunuş sayı: 8282
