Tramp: “Netanyahunu hücumu dayandırmağa mən razı saldım”
ABŞ Prezidenti Donald Tramp İranda rejim dəyişikliyi ilə bağlı suala cavabında bildirib ki, bu cür təşəbbüslər adətən xaosla nəticələndiyi üçün Birləşmiş Ştatlar İranda rejim dəyişikliyinə çalışmır.
Crossmedia.az xəbər verir ki, Tramp bu fikirləri NATO Liderlər Sammiti çərçivəsində Hollandiyanın Haaqa şəhərinə səfəri zamanı, "Air Force One" təyyarəsində jurnalistlərin suallarını cavablandırarkən səsləndirib.
O, həmçinin İsrailin həmin gün İrana planlaşdırılan hava hücumlarını dayandırdığını, atəşkəs rejiminin hələ də qüvvədə olduğunu bildirib:
“İsrail bu səhər təyyarələrini geri çevirdi, hücum olmadı. Bu, əhəmiyyətli hadisədir və biz buna sevinirik. Atəşkəsin uzunmüddətli olacağına inanırıq”, – deyə o vurğulayıb.
Tramp açıqlamasında İsrailin Baş naziri Benyamin Netanyahu ilə telefon danışığı apardığını və ona "təyyarələrini geri çevir" mesajını verdiyini də açıqlayıb.
Sosial mediada paylaşımına da toxunan Tramp bildirib ki, hər iki tərəf – İsrail və İran – gərginliyin təkrarlanmasından yorulub və onun mesajları nəticəsində heç bir insan tələfatı qeydə alınmayıb:
“İsrail də, İran da artıq bundan bezib. Mənim yazılarıma görə heç kim həlak olmayıb”, – deyə əlavə edib.
ABŞ Prezidenti onu da qeyd edib ki, mövcud pozuntulara baxmayaraq, hər iki ölkəyə qarşı yeni sanksiyaların tətbiqi gündəmdə deyil və diplomatik yanaşma üstünlük təşkil edir.
01:47 25.06.2025
Oxunuş sayı: 9850
