Bakıda İtaliyanın Milli Günü münasibətilə rəsmi qəbul təşkil olunub
İyunun 24-də Bakıda İtaliyanın Milli Gününə həsr olunmuş rəsmi qəbul keçirilib.
Crossmedia.az xəbər verir ki, tədbirdə əvvəlcə Azərbaycanın və İtaliyanın Dövlət himnləri səsləndirilib.
Çıxış edən İtaliyanın Azərbaycandakı səfiri Luka di Canfrançesko Azərbaycanla İtaliya arasında diplomatik münasibətlərin tarixindən söz açaraq, ilk dəfə hələ 1919-cu ildə Bakıda İtaliya nümayəndəliyinin açıldığını xatırladıb.
Səfir bildirib ki, İtaliya Azərbaycanın bir nömrəli ticarət tərəfdaşı, Azərbaycan isə İtaliyanın mühüm strateji enerji təchizatçısıdır. O, bu əməkdaşlığın qeyri-enerji sahələrində və işğaldan azad olunmuş ərazilərin bərpasında da davam etdirilməsində maraqlı olduqlarını qeyd edib.
İki ölkə arasında strateji tərəfdaşlığın yüksəksəviyyəli siyasi dialoqa əsaslandığını vurğulayan Luka di Canfrançesko dövlət başçıları və hökumət rəhbərləri arasında son illərdə keçirilən görüşləri xatırladıb. Diplomat, həmçinin mədəni əməkdaşlığa toxunaraq, Azərbaycanda “Made in Italy” məhsullarına və İtaliya mədəniyyətinə böyük maraq göstərilməsini sevindirici hal hesab edib.
Azərbaycanın elm və təhsil naziri Emin Əmrullayev çıxışında İtaliya hökumətini və xalqını təbrik edib, iki ölkə arasında əlaqələrin strateji tərəfdaşlıq səviyyəsində olduğunu bildirib. O, İtaliya şirkətlərinin Azərbaycanın müxtəlif sahələrində fəal iştirak etdiyini məmnunluqla vurğulayıb.
Nazir elm və təhsil sahəsində əməkdaşlığın inkişaf etdiyini, bir sıra universitetlər arasında tələbə və müəllim mübadiləsinin həyata keçirildiyini bildirib. O, bu istiqamətdə birgə layihələrin və tədqiqatların əhəmiyyətini qeyd edib.
Emin Əmrullayev, həmçinin İtaliyanın COP29 çərçivəsində dəstəyini və iştirakını yüksək qiymətləndirərək gələcək əməkdaşlığın genişlənəcəyinə əminliyini ifadə edib.
Sonra qonaqlar üçün bədii proqram təqdim olunub.
21:50 24.06.2025
Oxunuş sayı: 641
