Azad olunmuş ərazilərdə işəgötürənlərlə növbəti görüş keçirilib
Əmək və Əhalinin Sosial Müdafiəsi Nazirliyində işğaldan azad olunmuş ərazilərdə fəaliyyət göstərən işəgötürənlərlə növbəti görüş keçirilib.
Bu barədə Crossmedia.az Nazirliyə istinadən xəbər verir.
Bildirilib ki, tədbirdə Rəqəmsal İnkişaf və Nəqliyyat Nazirliyi, Ekologiya və Təbii Sərvətlər Nazirliyi, Kənd Təsərrüfatı Nazirliyi, Müdafiə Nazirliyi, Dövlət Sərhəd Xidməti, Qaçqınların və Məcburi Köçkünlərin İşləri üzrə Dövlət Komitəsi, Məcburi Köçkünlərin Sosial İnkişaf Fondu, İqtisadi İslahatların Təhlili və Kommunikasiya Mərkəzi, Tibbi Ərazi Bölmələrini İdarəetmə Birliyi, Minatəmizləmə Agentliyi, Mənzil İnşaatı Dövlət Agentliyi, Azərbaycan Avtomobil Yolları Dövlət Agentliyi, İqtisadi Zonaların İnkişafı Agentliyi, “Polat Yol Yapı Sanayi ve Ticaret Anonim Şirketin”in ölkəmizdəki filialı və "Körpü-Bina-Tikinti" MMC-nin nümayəndələri iştirak edib.
Əmək və əhalinin sosial müdafiəsi nazirinin müavini Vüsal Nəsirli Böyük Qayıdışa dair Dövlət Proqramının icrası işlərinin mühüm bir istiqamətinin işğaldan azad olunmuş ərazilərə köçürülən sakinlərinin məşğulluğunun təminatı olduğunu qeyd edib. O bu məqsədlə aktiv məşğulluq proqramlarının icrasında işəgötürənlərlə sıx əməkdaşlığın mühüm rolunu vurğulayıb.
Görüşdə işğaldan azad olunan bölgələriimizdə məskunlaşan və məskunlaşması nəzərdə tutulan vətəndaşların məşğulluqlarının təmin olması sahəsində görülmüş işlərdən bəhs olunub. Bu istiqamətdə tədbirlərin daha da gücləndirilməsi və səmərəliliyinin artırılması məsələləri müzakirə edilib.
18:34 18.06.2025
Oxunuş sayı: 14322
