İran Tel-Əviv sakinlərinə şəhəri tərk etmə çağırışı etdi
İsrailin İrana qarşı başladığı və İranın cavab zərbələri ilə davam edən müharibə dördüncü gününə qədəm qoyub. Tərəflər arasında qarşılıqlı hücumlar bölgədə gərginliyi daha da artırır.
Crossmedia.az xarici KİV-ə istinadən xəbər verir ki, İran İsrailin Kirmanşah şəhərinə endirdiyi hücum nəticəsində Farabi xəstəxanasının zərər görməsini “müharibə cinayəti” kimi qiymətləndirərək, bu hücumu sərt şəkildə qınayıb.
İsrailin Baş naziri Benyamin Netanyahu isə ölkəsinin hava qüvvələrinin Tehran üzərində hava məkanında nəzarəti ələ keçirdiyini iddia edib və Tehran əhalisinə şəhəri tərk etməyi tövsiyə edib. Buna cavab olaraq İran da Tel-Əviv sakinlərinə oxşar çağırışla müraciət edib: “Şəhəri dərhal tərk edin”.
13 iyun tarixində İsrail tərəfindən başladılan “Yüksələn Aslan” adlı əməliyyatla başlayan qarşıdurmalarda İranda aralarında Baş Qərargah rəisi Məhəmməd Bakıri və SEPAH Komandanı Hüseyn Səlami kimi yüksək rütbəli şəxslərin də olduğu ən azı 224 nəfər həlak olub, 1277 nəfər yaralanıb.
İranın cavab zərbələri “Həqiqi Vəd 3” adı altında həyata keçirilib. Onlarla dron, yüzlərlə ballistik və hipersonik raketin iştirak etdiyi hücumlar nəticəsində Tel-Əviv, Qüds və Hayfa şəhərlərində güclü partlayışlar qeydə alınıb. İsrailin hava hücumundan müdafiə sistemi “Dəmir Qübbə”ni keçən İran raketləri nəticəsində İsraildə 24 nəfər həyatını itirib, 592 nəfər yaralanıb.
Ölkə üzrə sirenlər fasiləsiz olaraq səsləndirilir, İsrail ordusu isə əhaliyə sığınacaqlara yaxın qalmaqla bağlı təlimatlarını yeniləyib.
Mədinə Cəlilova
22:00 16.06.2025
Oxunuş sayı: 8920
