Ərdoğan: "İsrail nə etdiyini bilmir, bu hücumlar regionu hədəfləyir!"
Türkiyə prezidenti Rəcəb Tayyib Ərdoğanın sədrliyi ilə Ankarada Beştəpə Prezident Külliyəsində keçirilən Nazirlər Kabinetinin iclasından sonra o, İsrail-İran münaqişəsi ilə bağlı sərt açıqlamalar verib.
Crossmedia.az xəbər verir ki, Ərdoğan çıxışında İsrailin İrana qarşı həyata keçirdiyi hücumların arxasında nüvə obyektlərini bəhanə edərək daha geniş və təhlükəli məqsədlərin dayandığını bildirib:
“İsrail nə etdiyini bilmir. Bəlkə də gec olmayınca dərk etməyəcək. Bu hücumlar sadəcə İranı deyil, bütün regionu hədəf alır. Fələstin xalqına və torpaqlarına yönələn təcavüzlər, indi İrana qarşı yönəlib. Bu, təkcə bir neçə milyon insanla məhdudlaşan məsələ deyil”.
Türkiyə Prezidentinin sözlərinə görə, münaqişənin həlli üçün diplomatik yollar tükənməyib:
“Biz cümə günündən bəri münaqişələrin qarşısını almaq üçün intensiv diplomatik fəaliyyət göstəririk. Bildirmişik ki, problemin həlli ancaq dialoqla mümkündür və Türkiyə bu istiqamətdə nə lazımdırsa, etməyə hazırdır”.
Ərdoğan bölgədə atılan hərbi addımların geniş miqyaslı fəlakətlərə yol aça biləcəyini vurğulayıb:
“Mülki və hərbi fərq etməz - bombalarla masa arxasında həll edilməyə çalışılan problemlər nəticədə böyük fəlakətlərə səbəb olur. Bu qədim coğrafiyada heç bir ölkə yalnız öz sərhədləri ilə məhdudlaşa bilməz”.
Türkiyə lideri bölgədəki proseslərdən nəticə çıxararaq müdafiə qabiliyyətini artıracaqlarını da deyib:
“Heç kimin bizi tənqid edə bilməyəcəyi səviyyədə müdafiə gücünə çatacağıq. Biz öz sistemlərimizi istehsal edir, texnologiyamızı inkişaf etdiririk. Artıq Türkiyə dünyada pilotsuz uçuş aparatları sahəsində lider ölkələrdən biridir”.
20:17 16.06.2025
Oxunuş sayı: 10198
