İsrailli rəsmi: "İrana qarşı əməliyyatlar 2-3 həftə davam edə bilər"
İsrailin İrana qarşı həyata keçirdiyi hərbi əməliyyatların 2-3 həftə davam edə biləcəyi ehtimal olunur.
Crossmedia.az “The Times of Israel”ə istinadən xəbər verir ki, bu barədə məlumat verən israilli yüksək rütbəli rəsmi əməliyyatın müddətinin siyasi rəhbərliyin qərarlarından asılı olduğunu bildirib.
Onun sözlərinə görə, əgər yalnız müəyyən hərbi hədəflər hədəfə alınarsa, kampaniya qısa müddətdə başa çata bilər. Lakin siyahıya hökumət binaları, iqtisadi və digər strateji obyektlər də əlavə edilərsə, əməliyyatın vaxtı uzana bilər.
Mənbə qeyd edib ki, əməliyyatın əsas məqsədi İranın nüvə proqramına zərbə vurmaq və bununla da Tehranla Qərb ölkələri arasında daha sərt nüvə razılaşmasının əldə olunmasına şərait yaratmaqdır.
İsrail tərəfi bildirir ki, İran vasitəçilər vasitəsilə mesaj göndərərək hücumların dayandırılması halında danışıqlara qayıtmağa hazır olduğunu bəyan edib.
Hazırda İsrail döyüş meydanında vurulan hədəflərlə bağlı qiymətləndirmə aparır. Rəsmi məlumatlara görə, yerüstü obyektlərlə yanaşı, Natanzdakı yeraltı obyektlərə də ziyan dəyə bilər. Lakin Forododakı nüvə obyektinə ciddi zərbə vurmaq imkanlarının məhdud olduğu qeyd olunur.
18:57 16.06.2025
Oxunuş sayı: 11697
