Misir Mərdanov Rusiya – Ukrayna müharibəsinin təhsil sahəsində Azərbaycana təsirindən danışdı: “Sovet dövründə...”
Ukraynanın Azərbaycandakı səfiri Yuri Qusev Bakıda Ukrayna ali təhsil müəssisələrinin sərgisinin açılış mərasimində deyib ki, Ukrayna Azərbaycanla təhsil sahəsində əlaqələrin genişləndirilməsində maraqlıdır.
O, həmçinin bildirib ki, azərbaycanlı tələbələrin Ukraynada təhsil alması yerli universitetlərin təhsil sisteminə inamı nümayiş etdirir.
"Bu gün dörd mindən çox Azərbaycan vətəndaşı Ukraynada ali təhsil alır. Bu, Ukrayna universitetlərinə və təhsil sistemimizə etimadın bariz göstəricisidir", - səfir bildirib.
Y.Qusev əlavə edib ki, Kiyev Bakı ilə təhsil mübadiləsində maraqlıdır.
“Biz Ukrayna ilə Azərbaycan arasında akademik mübadilələrin, ikili diplom proqramlarının, birgə tədqiqat layihələrinin və tələbə mobilliyi imkanlarının daha da inkişaf etdirilməsində xüsusilə maraqlıyıq”, - diplomat vurğulayıb.
İki ölkə arasında elm sahəsində mümkün əməkdaşlıq barədə Crossmedia.az-a danışan keçmiş təhsil naziri Misir Mərdanov bildirib ki, sovet dövründə Azərbaycanla Ukrayna arasında çox ciddi elmi əlaqələr olub:
“Riyaziyyat, fizika, kimya, informatika və digər sahələr üzrə əməkdaşlıq yüksək səviyyədə idi. Sovet hökuməti dağılandan sonra isə bu əlaqələr demək olar ki, kəsildi. Xatırlayıram, Bakı Dövlət Universitetinə rəhbərliyim dövründə iki dəfə beynəlxalq konfrans təşkil etmişdik və Ukrayna alimlərini dəvət etmişdik. Məqsəd keçmiş əlaqələri bərpa etmək idi. Təəssüf ki, Rusiya ilə Ukrayna arasında başlayan müharibə bu cəhdlərə ciddi maneələr yaratdı”.
M.Mərdanovun sözlərinə görə, müharibə bitdikdən sonra əlaqələrin yenidən bərpası üçün real imkanlar yarana bilər: “Əgər vəziyyət sabitləşərsə və tərəflər üçün münasib şərait yaranarsa, bu əməkdaşlığı yenidən qurmaq mümkündür. Həm bizim üçün, həm də Ukrayna üçün birgə elmi tədqiqatlar və akademik mübadilə böyük əhəmiyyət daşıyır. Elmi əlaqələrin yenidən qurulması həm Azərbaycan, həm də Ukrayna üçün strateji əhəmiyyət kəsb edir və bu əməkdaşlığın bərpası hər iki ölkənin elmi-texniki inkişafına mühüm töhfə verə bilər”.
Zəhra Ağayeva
14:05 16.06.2025
Oxunuş sayı: 11889
