Teatr biletlərinə keşbek tətbiq olunacaq - Mədəniyyət sektorunda vergi güzəştləri başlayır
"Vergi Məcəlləsi”nə edilən dəyişikliklərə əsasən, 2025-ci il iyulun 1-dən etibarən mədəniyyət sektorunda yeni vergi güzəştləri tətbiq olunacaq.
Crossmedia.az xəbər verir ki, bu barədə deputat Vüqar Bayramov sosial şəbəkə hesabında paylaşım edib.
Deputatın sözlərinə görə, dəyişikliklərin əsas məqsədi bu sahəyə daha çox sərmayə cəlb edərək mədəniyyət sektorunun inkişafını stimullaşdırmaqdır:
“Eyni zamanda, bu, mədəniyyət sektorunda bir sıra xidmətlərin xərclərinin azalmasına, eləcə də qiymətin aşağı düşməsinə səbəb ola bilər,” – deyə o bildirib.
Qeyd edilib ki, iyulun 1-dən etibarən teatr tamaşaları, film nümayişləri, muzey ziyarətləri və simfonik orkestr konsertlərinə görə nağdsız şəkildə ödənilən ƏDV-nin 50 faizi ("ƏDVcashback") vətəndaşlara geri qaytarılacaq. Beləliklə, mədəniyyət xidmətlərinə də keşbek sistemi tətbiq olunacaq.
Bundan əlavə, mədəniyyət sektorunda fəaliyyət göstərən subyektlər üçün 5 il müddətinə torpaq vergisindən tam, mənfəət (gəlir) vergisindən isə 90 faiz azadolma nəzərdə tutulur.
Deputat Bayramov əlavə edib ki, bu dəyişikliklərlə mənfəət (gəlir) vergisi üzrə güzəştin həcmi 75 faizdən 90 faizə qaldırılıb və güzəşt verilən subyektlərin sayı 1-dən 5-ə çatdırılıb. Yeni siyahıya teatr, muzey, simfonik orkestr və film prodüserləri də əlavə olunub.
15:35 11.06.2025
Oxunuş sayı: 4039
