Kaliforniyada soydaşlarımız avtoyürüş keçirib
ABŞ-nin Kaliforniya ştatının Bay Area ərazisində yaşayan azərbaycanlılar 28 May – Müstəqillik Günü və Azərbaycan Xalq Cümhuriyyətinin yaranmasının 107-ci ildönümünə həsr olunan tədbirdə bir araya gəliblər. Şimali Kaliforniya Azərbaycan Mədəniyyət Cəmiyyətinin təşkilatçılığı ilə əvvəlcə avtomobillərin yürüşü, sonra şəbəkələşmə tədbiri keçirilib. Bu barədə Diasporla İş üzrə Dövlət Komitəsindən məlumat verilib.
Bildirilib ki, günün ilk yarısı Azərbaycan bayraqları ilə bəzədilən avtomobil karvanı Kupertino və San Xose şəhərlərindən keçərək San Fransiskoya doğru hərəkət edib. Karvan yüzlərlə yerli sakinin marağına səbəb olub.
Yürüşdən sonra Azərbaycan icmasının iştirakı ilə şəbəkələşmə tədbiri baş tutub.
Şimali Kaliforniya Azərbaycan Mədəniyyət Cəmiyyətinin Əməliyyatlar və tədbirlər üzrə katibi Nurlan Şükürlü bu cür tədbirlərin yeni gələn icma üzvləri ilə uzun müddət ABŞ-də yaşayan azərbaycanlılar arasında mühüm körpü rolu oynadığını qeyd edib. O belə təşəbbüslərin ABŞ-də doğulan azərbaycanlı uşaqların öz köklərini unutmaması, milli kimliklərinə sahib çıxması və Azərbaycan mədəniyyəti ilə daha yaxından tanış olması baxımından mühüm əhəmiyyət kəsb etdiyini bildirib.
Tədbir iştirakçılarına Azərbaycanın ləziz təamları təqdim olunub. Uşaqlar isə müxtəlif əyləncəli oyunlarla xoş vaxt keçiriblər. Soydaşımız müğənni Günay Sənanın və “Sound of Fire” (“Alov səsi”) nağara qrupunun ifasında səsləndirilən musiqilər böyük coşğu ilə qarşılanıb.
13:29 02.06.2025
Oxunuş sayı: 12963
