BDU-da beynəlxalq konfrans: Rəqəmsal dövrün çağırışları və yeni strateji yanaşmalar müzakirə olunub
Bu gün Bakı Dövlət Universitetində (BDU) Azərbaycan milli mətbuatının 150 illik yubileyinə həsr olunmuş “Rəqəmsal dövrdə media və kommunikasiya fəaliyyəti” mövzusunda beynəlxalq konfransın əsas sessiyası keçirilib.
Crossmedia.az xəbər verir ki, tədbir BDU və Türkiyənin Üsküdar Universitetinin birgə təşkilatçılığı, Medianın İnkişafı Agentliyi, Audiovizual Şura və Azərbaycan Mətbuat Şurasının tərəfdaşlığı ilə baş tutub.
Açılış mərasimində Azərbaycan və Türkiyə himnləri səsləndirilib, Ümummilli Lider Heydər Əliyevin və şəhidlərin xatirəsi bir dəqiqəlik sükutla yad olunub. Ardınca milli mətbuatın 150 illiyinə həsr edilmiş videoçarx nümayiş etdirilib.
Konfransda çıxış edən BDU-nun rektoru Elçin Babayev milli mətbuatın keçdiyi tarixi yola və əldə edilən nailiyyətlərə diqqət çəkib.
O, xüsusilə Azərbaycanın müstəqilliyini bərpa etməsindən sonra mətbuat azadlığının inkişafı istiqamətində atılan addımları vurğulayıb.
Rektor qeyd edib ki, Həsən bəy Zərdabinin təsis etdiyi “Əkinçi” qəzetinin maarifçi xətti bu gün də davam etdirilir və 1998-ci ildə Ümummilli Lider Heydər Əliyevin senzuranı ləğv etməsi bu prosesdə mühüm mərhələ olub. Elçin Babayev həmçinin Prezident İlham Əliyevin dəstəyinin bu sahənin davamlı inkişafına zəmin yaratdığını bildirib.
Tədbirdə iştirak edən Üsküdar Universitetinin rektoru Nazife Güngör çıxışında Azərbaycan və Türkiyə arasında təhsil və mətbuat sahəsində əməkdaşlığın strateji əhəmiyyətini önə çəkib.
O, ortaq tarix və mədəniyyətə əsaslanan əlaqələrin gələcəkdə daha da möhkəmləndirilməsinin vacibliyini vurğulayıb.
“Azərbaycan Televiziya və Radio Verilişləri” QSC-nin sədri Rövşən Məmmədov BDU-da keçirilən beynəlxalq konfransda media və informasiya sahəsində aktual məsələlərə toxunub.
O, rəqəmsallaşmanın zəruriliyini, klassik medianın geri çəkilməməli olduğunu və Azərbaycanda informasiyalı cəmiyyətin formalaşdığını bildirib.
Sədr informasiya manipulyasiyalarına qarşı maarifləndirmə və təhlükəsizlik strategiyalarının vacibliyini vurğulayıb, bu məqsədlə “Medialab” layihəsinin təqdim olunduğunu qeyd edib. O, çıxışında 44 günlük Vətən müharibəsində Prezident İlham Əliyevin informasiya idarəçiliyində göstərdiyi peşəkarlığı da nümunə kimi dəyərləndirib.
Azərbaycan Mətbuat Şurasının sədri Rəşad Məcid isə “Əkinçi” qəzetinin dövrün çətinlikləri fonunda göstərdiyi fədakarlıqdan danışıb və Prezident İlham Əliyevin mətbuata verdiyi önəmi diqqətə çatdırıb.
Medianın İnkişafı Agentliyinin İcraçı direktorunun müavini Natiq Məmmədli və digər media mütəxəssisləri də çıxış edərək, müasir dövrdə milli medianın qarşısında duran çağırışlar, rəqəmsallaşma prosesi və jurnalistikanın gələcək istiqamətləri barədə fikirlərini bölüşüblər.
Konfrans çərçivəsində BDU-nun “Media problemləri” adlı yeni elmi-nəzəri və analitik jurnalının ilk sayı da təqdim olunub.
Nəşrin redaktoru, professor Qulu Məhərrəmli jurnalın məqsəd və məzmunu barədə məlumat verərək, bu platformanın media sahəsində elmi təhlillərin aparılması baxımından əhəmiyyətini vurğulayıb.
Tədbir BDU-nun Mədəniyyət-yaradıcılıq Mərkəzinin hazırladığı bədii hissə ilə yekunlaşıb.
Konfransın açılış mərasimindən sonra panel iclaslar başlayıb. Həm Türkiyədən, həm də Azərbaycandan olan professorlar, tədqiqatçılar və gənc alimlər panel iclaslarda iştirak ediblər. Onların müxtəlif mövzularla bağlı məruzləri dinlənilib.
Konfrans Azərbaycan milli mətbuatının 150 illik tarixini anmaqla yanaşı, rəqəmsal çağın çağırışları fonunda medianın gələcək inkişaf istiqamətlərinin müəyyən olunması baxımından mühüm bir müzakirə platforması kimi yadda qalıb.
Bu cür tədbirlər yalnız keçmişə nəzər salmaq üçün deyil, həm də yeni dövrün tələblərinə uyğun strateji yanaşmaların formalaşdırılması baxımından xüsusi əhəmiyyət daşıyır.
Qeyd edək ki, konfrans mayın 14-də başlayıb və mayın 16-da başa çatacaq.
Aybəniz Səfərova
16:48 15.05.2025
Oxunuş sayı: 22847
