Ərdoğan xalqa müraciət etdi: "86 milyon vətəndaşın gələcəyi etibarlı əllərdədir"
PKK terror təşkilatının silahı yerə qoyaraq, fəaliyyətinə son verdiyini elan etməsinin ardından Türkiyədə Nazirlər Kabinetinin ilk iclası baş tutub.
Crossmedia.az türk mətbuatına istinadən xəbər verir ki, iclasdan sonra Türkiyə Prezidenti Rəcəb Tayyib Ərdoğan xalqa müraciət edib.
Ərdoğan çıxışında PKK ilə mübarizədə şəhid olanların ailələrinə başsağlığı verərək bildirib: “Bu millət daha çox sülhə və rifaha nail olacaq”.
Onun sözlərinə görə, iclasda ölkənin təhlükəsizlik məsələləri, iqtisadi vəziyyəti və bölgədə baş verən geosiyasi dəyişikliklər əsas müzakirə mövzusu olub.
Türkiyə lideri vurğulayıb ki, dünya kritik dönüş nöqtəsindədir və prezident idarəetmə sistemi Türkiyəyə bu xaotik dövrdə effektiv qərarlar qəbul etməyə imkan verir.
“86 milyon vətəndaşın gələcəyi etibarlı və məsuliyyətli əllərdədir. İş adamlarımız və investorlarımız təşvişə düşməsin”, - deyə Prezident əlavə edib.
Ərdoğan həmçinin Pakistanla Hindistan arasında əldə olunan atəşkəsi müsbət qiymətləndirib və bu sakitliyin digər problemlərin, xüsusilə su məsələsinin həllinə töhfə verəcəyini bildirib.
Səfər planlarına toxunan Ərdoğan, növbəti İtaliya səfərində Baş nazir Giorgia Meloni ilə ticarət dövriyyəsinin 40 milyard dollara çatdırılması məsələsini müzakirə edəcəyini açıqlayıb.
Aybəniz Səfərova
20:49 12.05.2025
Oxunuş sayı: 875
