Paşinyanın partiyası 2026-cı il seçkilərinə təkbaşına gedəcək
Ermənistanın baş naziri Nikol Paşinyanın rəhbərlik etdiyi iqtidar partiyası — “Vətəndaş Müqaviləsi” 2026-cı ildə keçiriləcək parlament seçkilərində digər siyasi qüvvələrlə ittifaq qurmayacaq.
Croosmedia.az xəbər verir ki, bu barədə parlamentin sədri və partiyanın idarə heyətinin üzvü Alen Simonyan brifinq zamanı açıqlama verib.
“Əminəm ki, biz seçkilərə təkbaşına qatılacağıq, koalisiya yaratmayacağıq və xalqın böyük əksəriyyətinin dəstəyini qazanacağıq”, – deyə o bildirib.
Simonyan, həmçinin, Ermənistanın ikinci prezidenti Robert Koçaryanın reytinqində artım olmasının onları narahat etmədiyini qeyd edib.
“Ermənistan xalqı yaxşı bilir ki, Koçaryan hakimiyyətə gəlmək və ölkəmizi Rusiya və Belarus ittifaqına qatmaq istəyir”, – deyə o əlavə edib.
Qeyd edək ki, Ermənistanda növbəti parlament seçkilərinin 2026-cı ilin iyun ayında keçirilməsi planlaşdırılır.
Xumar Emilqızı
16:20 08.05.2025
Oxunuş sayı: 660
