Bakıda Özbəkistan universitetlərinin sərgisi: Qardaş ölkələr arasında təhsil körpüsü
Azərbaycanda ilk dəfə olaraq “Ingla School Baku”nun təşkilatçılığı ilə Özbəkistan universitetlərinin sərgisi keçirilib.Qardaş ölkədə yerləşən ali məktəblər Bakıda keçirilən beynəlxalq təhsil sərgisində iştirak edib, ortaq layihələr üçün ilkin razılaşmalar əldə etməyə hazırlaşır. 15-ə qədər nüfuzlu universitetin nümayəndələri bu məqsədlə Azərbaycana gəliblər.
Özbəkistan universitelərinin sərgisinin əhəmiyyəti barədə Crossmedia.az saytına açıqlama verən Milli Məclisin deputatı Müşfiq Cəfərov bu cür tədbir və sərgilərin təşkilinin Özbəkistan və Azərbaycan arasındakı münasibətləri daha da möhkəmləşdirdiyini bildirdi: "Özbəkistan bizim üçün qardaş dövlətdir və dilimiz, dinimiz ortaqdır, belə tədbirlər hər iki ölkənın münasibətlərini daha da yaxınalşdırır.Çünki təhsil, ümumilikdə, bir ölkənin, bir dövlətin və xalqın gələcəyini müəyyən edən əsas amillərdəndir. Bu gün burada Özbəkistanın bir çox universitetlərini görürük. Onların arasında yalnız yerli dövlət universitetləri deyil, həmçinin xarici ölkələrin Özbəkistanda açdıqları ali təhsil müəssisələri də təmsil olunurlar. Hesab edirəm ki, bu universitetlərin ölkəyə gətirdiyi beynəlxalq təhsil standartları Özbəkistan təhsili üçün ciddi yenilik və inkişafdır".
Deputat təkcə Özbəkistan daxilindən deyil, eyni zamanda digər ölkələrdən, o cümlədən qardaş ölkəmizə Azərbaycandan da həmin universitetlərə tələbə marağının mövcudluğunu inkişafın nəticəsi kimi qiymətləndirir: "Bu tədbirin əsas məqsədi də gənclərə bu universitetlər və onların fəaliyyəti barədə dolğun məlumat təqdim etməkdir.
Əminliklə deyə bilərik ki, bu gün Azərbaycanda da təhsil sahəsinə xüsusi önəm verilir və universitetlərimiz ilbəil beynəlxalq reytinq cədvəllərində layiqli yerlər tutmağa çalışırlar. Bu elə bir prosesdir ki, burada daim hərəkətdə olmaq, yeniliklərə açıq olmaq və müasir tələbləri tətbiq etmək zəruridir".
M.Cəfərov sonda bildirib ki, iki qardaş ölkə arasında olan bu əlaqələr, xüsusilə təhsil sahəsindəki əməkdaşlıqlar gələcəkdə də mühüm töhfələr verəcək və həm azərbaycanlı, həm də özbəkistanlı gənclərin inkişafına xidmət edəcəkdir.
Qeyd edək ki, mayın 3-də İngla School Baku-nun təşkilatçılığı ilə AMEA Mərkəzi Elmi Kitabxanasında Özbəkistan universitetlərinin sərgisi keçirilib. Tədbirin tərəfdaşları Özbəkistan Ali Təhsil Nazirliyi, Özbəkistanın Azərbaycandakı Səfirliyi, AMEA Mərkəzi Elmi Kitabxanası (MEK), Crossmedia.az Analitik informasiya Portalı idi.
Qardaş Özbəkistanın 15-ə qədər nüfuzlu universitetlərindən – STARS Beynəlxalq Universiteti, Jurnalistika və Kütləvi kommunikasiya Universiteti, Milli Tədqiqatlar Universiteti “Daşkənd İrreqasiya və Aqrotexnika Avtomatlaşdırma İnstitutu”, Özbəkistan-Finlandiya Pedaqogika Universiteti, Səmərqənd Dövlət Xarici Dillər Universiteti, Buxara Dövlət Universiteti, Əbu Əli İbni Sina adına Buxara Dövlət Tibb İnstitutu, İslam Kərimov adına Daşkənd Dövlət Texniki Universiteti, Daşkənd Tibb Akademiyası, Vebster Universiteti (Daşkənd), Turin Politexnik Universiteti Daşkənd Filialı, Kokand Pedaqoji Universiteti, Daşkənd Əczaçılıq Universiteti, Daşkənd Dövlət İqtisadiyyat Universiteti olmaqla 40-dan çox nümayəndə sərgiyə qatılıb.
Pərvin Hacıyeva
13:55 03.05.2025
Oxunuş sayı: 1910
