Buxara Dövlət Universitetinin dekanı: "Azərbaycanlı tələbələri qəbul etməyə hazırıq"
Buxara Dövlət Universitetinin İqtisadiyyat və Turizm fakültəsinin dekanı Nutfillo İbrahimov, Bakıda təşkil olunan Özbəkistan sərgisində iştirak edib.
O Crossmedia.az-a açıqlamasında bildirib ki, sərgi Azərbaycan və Özbəkistan arasında təhsil sahəsində əməkdaşlıq üçün yeni imkanlar yaradır: “Bu cür tədbirlər iki ölkənin potensial tələbələrini birləşdirmək baxımından çox önəmlidir. Biz də bu sərgiyə məhz bu məqsədlə qatılmışıq”.
İbrahimov Azərbaycanla əməkdaşlıqda maraqlı olduqlarını deyib: “Bakı Dövlət Universiteti və Azərbaycan Dövlət Bədən Tərbiyəsi və İdman Akademiyası ilə əməkdaşlıq imkanlarını araşdırırıq. Bundan əlavə, neft-qaz və turizm ixtisasları üzrə fəaliyyət göstərən təhsil müəssisələri ilə əlaqələr qurmaq niyyətindəyik. Universitetimizdə Fransanın tanınmış otelçilik məktəbi ilə birgə proqramlar mövcuddur.”
O əlavə edib ki, Buxara Dövlət Universiteti xarici dillərin tədrisinə də xüsusi önəm verir: “Bizdə ingilis, fransız, koreya, çin, yapon və hətta türk və tacik dilləri üzrə fakültələr mövcuddur. Azərbaycanlı tələbələr üçün ciddi imkanlar var. Bu baxımdan İngla School Baku ilə əməkdaşlıq bizim üçün də maraqlı ola bilər.”
Qeyd edək ki, mayın 3-də İngla School Baku-nun təşkilatçılığı ilə AMEA Mərkəzi Elmi Kitabxanasında Özbəkistan universitetlərinin sərgisi keçirilib. Tədbirin tərəfdaşları Özbəkistan Ali Təhsil Nazirliyi, Özbəkistanın Azərbaycandakı Səfirliyi, AMEA Mərkəzi Elmi Kitabxanası (MEK), Crossmedia.az Analitik informasiya Portalı idi.
Qardaş Özbəkistanın 15-ə qədər nüfuzlu universitetlərindən – STARS Beynəlxalq Universiteti, Jurnalistika və Kütləvi kommunikasiya Universiteti, Milli Tədqiqatlar Universiteti “Daşkənd İrreqasiya və Aqrotexnika Avtomatlaşdırma İnstitutu”, Özbəkistan-Finlandiya Pedaqogika Universiteti, Səmərqənd Dövlət Xarici Dillər Universiteti, Buxara Dövlət Universiteti, Əbu Əli İbni Sina adına Buxara Dövlət Tibb İnstitutu, İslam Kərimov adına Daşkənd Dövlət Texniki Universiteti, Daşkənd Tibb Akademiyası, Vebster Universiteti (Daşkənd), Turin Politexnik Universiteti Daşkənd Filialı, Kokand Pedaqoji Universiteti, Daşkənd Əczaçılıq Universiteti, Daşkənd Dövlət İqtisadiyyat Universiteti olmaqla 40-dan çox nümayəndə sərgiyə qatılıb.
Emil Bağızadə
13:17 03.05.2025
Oxunuş sayı: 19953
