MEK-də “Heydər Əliyev və Azərbaycan elmi” adlı lektoriya keçirilib
Azərbaycan Milli Elmlər Akademiyasının (AMEA) Mərkəzi Elmi Kitabxanasının (MEK) və YAP Yasamal rayon təşkilatının birgə təşkilatçılığı ilə Ümummilli Lider Heydər Əliyevin anadan olmasınn 102-ci ildönümü, AMEA-nın 80 illiyi münasibətilə “Heydər Əliyev və Azərbaycan elmi” adlı lektoriya keçirilib.
Tədbirdə tanınmış ziyalılar, AMEA-nın YAP ərazi partiya təşkilatlarının sədrləri, Gənc Alim və Mütəxəssislər Şurasının üzvləri iştirak ediblər.
MEK-in direktoru texnika elmləri doktoru Hüseyn Hüseynov lektoriyanı giriş nitqi ilə açaraq qeyd edib ki, görkəmli dövlət xadimi Heydər Əliyev özünün çoxillik dövlətçilik fəaliyyətində elmə xüsusi diqqət yetirib. Ulu Öndərin əsasını qoyduğu və milli inkişaf strategiyasının ayrılmaz tərkib hissəsi olan elmi siyasət ölkə Prezidenti cənab İlham Əliyev tərəfindən uğurla davam etdirilir. Elmi fəaliyyətin mühüm dayaqlarından biri kimi kitabxanaların roluna da toxunan H.Hüseynov qeyd edib ki, elmi informasiya təminatının gücləndirilməsi, müasir kitabxana-informasiya texnologiyalarının tətbiqi və elmi kitabxanaların inkişaf etdirilməsi istiqamətində atılan addımlar ölkəmizdə elmə və biliyə verilən dəyərin göstəricisidir.
Direktor MEK-in Heydər Əliyev və Azərbaycan dövlətçiliyi şöbəsində saxlanılan 1500-dən artıq nəşrdə Ulu Öndər haqqında bir-birini təkrarlamayan dəyərli fikirlərin yer aldığını xüsusi vurğulayıb və bildirib ki, məhz bu səbəbdən Ümummilli Liderin siyasi həyatı daim araşdırılmalı və tədqiq olunmalıdır.
Müstəqillik illərində bütün sahələrdə olduğu kimi, kitabxana işi sferasında da inqilabi çevriliş edildiyini bildirən MEK rəhbəri kitabxanaların özəlləşdirilməsi, onların binalarının başqa məqsədlər üçün istifadə olunması Ümummilli Liderin Fərmanı ilə qadağan edildiyini, ölkədə mövcud kitabxana şəbəkələrinin qorunub saxlandığını qeyd edib.
YAP Yasamal rayon təşkilatının sədri Bəxtiyar Nəbiyev çıxışında Azərbaycanın müasir inkişafının təməlində Ümummilli Lider Heydər Əliyevin rəhbərliyi ilə həyata keçirilmiş siyasətin dayandığını vurğulayıb. Natiq Ulu Öndərin ölkəyə rəhbərliyinin hər iki dönəmində Azərbaycan elminə, xüsusən Milli Elmlər Akademiyasına göstərdiyi diqqət və qayğının canlı şahidi olduqlarını qeyd edib. AMEA-nın da öz növbəsində hər zaman dövlətçiliyə sədaqət nümayiş etdirdiyini, 1992-ci ildə yeni yaradılacaq siyasi partiyaya rəhbərlik etməsi üçün Ulu Öndərə müraciət edən 91 nəfərin əksəriyyətinin məhz akademiyanın dəyərli akademikləri, professorları, elmi sahədə çalışan əməkdaşlarının olduğunu bildirib.
B.Nəbiyev çıxışı zamanı AMEA-nın yaradılmasının 80 illiyi, Mərkəzi Elmi Kitabxananın 100 illiyi münasibətilə tədbir iştirakçılarını Partiya adından təbrik edib.
AMEA Fəlsəfə institutunun elmi işlər üzrə direktor müavini, tarix elmləri doktoru, fövqəladə və səlahiyyətli səfir Eynulla Mədətli Ulu Öndər Heydər Əliyevin rəhbərliyi dövründə Azərbaycan elminin prioritet istiqamətlərindən danışıb, fundamental və tətbiqi elmlərin inkişafı üçün ciddi addımların atıldığını qeyd edib. Alim diqqətə çatdırıb ki, 1993-cü ildə xalqın tələbi ilə hakimiyyətə qayıtdıqdan sonra Heydər Əliyev Azərbaycan elminə yeni nəfəs verdi, müstəqil dövlət quruculuğu şəraitində elmin hüquqi bazası formalaşdırıldı, AMEA-nın statusu yenidən təsbit olundu və elmin cəmiyyətə xidmət edən əsas institut kimi rolu gücləndirildi.
Tədbirdə çıxış edən AMEA M.Füzuli adına Əlyazmalar İnstitutunun direktoru, akademik Teymur Kərimli qeyd edib ki, Azərbaycan elminin və Milli Elmlər Akademiyasının formalaşması və inkişafında Heydər Əliyev–İlham Əliyev epoxası xüsusi tarixi mərhələ təşkil edir. O, bu dövrdə elmin dövlət siyasətinin prioritet sahələrindən birinə çevrildiyini, alimlərin fəaliyyətinə göstərilən diqqət və qayğının elmi nailiyyətlərin artmasına səbəb olduğunu bildirib.
AMEA Azad Həmkarlar İttifaqının sədri siyasi elmlər üzrə fəlsəfə doktoru, dosent Sənan Həsənov, AMEA Fəlsəfə və Sosiologiya İnstitutunun "İdrak nəzəriyyəsi" şöbəsinin müdiri, fəlsəfə elmləri doktoru Füzuli Qurbanov və digər çıxışçılar alimlərin sosial müdafiəsi və elmi fəaliyyətə yaradılan şəraiti dövlətin elmə verdiyi dəyərin göstəricisi kimi dəyərləndiriblər, MEK-in Heydər Əliyev və Azərbaycan dövlətçiliyi şöbəsinin müdiri Günel Bağırova-Hüseynova isə sayca 15-ci dəfə keçirilən lektoriyanın şöbənin yaranmasının 20 illiyinə təsadüf etdiyini diqqətə çatdırıb.
Tədbirdə Heydər Əliyevin siyasi irsinə dair nəşrlər sərgilənib, Azərbaycan elminə verdiyi töhfələrdən və AMEA-nın inkişaf mərhələlərinə dair videosüjet nümayiş etdirilib.
17:13 02.05.2025
Oxunuş sayı: 10567
