Özbəkistan universitetlərinin nümayəndələri “Ingla School Baku”nun təşkilatçılığı ilə Azərbaycana gəlib
Azərbaycanda ilk dəfə olaraq “Ingla School Baku”nun təşkilatçılığı ilə Özbəkistan universitetlərinin sərgisi keçiriləcək. Tədbirin tərəfdaşları Özbəkistan Ali Təhsil Nazirliyi, Özbəkistanın Azərbaycandakı Səfirliyi, AMEA Mərkəzi Elmi Kitabxanası (MEK), Crossmedia.az Analitik İnformasiya Portalıdır.
Tədbir 03 may 2025-ci ildə MEK-in Sərgi salonunda ("Elmlər Akademiyası" metro stansiyasının yaxınlığında) keçiriləcək və saat 10:00-dan 17:00-a qədər qədər davam edəcək.
Crossmedia.az xəbər verir ki, qardaş Özbəkistanın 15-ə qədər nüfuzlu universitetlərindən - Səmərqənd Dövlət Xarici Dillər Universiteti, Buxara Dövlət Universiteti, Əbu Əli İbni Sina adına Buxara Dövlət Tibb İnstitutu, İslam Kərimov adına Daşkənd Dövlət Texniki Universiteti, Daşkənd Tibb Akademiyası, Milli Tədqiqatlar Universiteti, Daşkənd İrreqasiya və Aqrotexnika Avtomatlaşdırma İnstitutu, STARS International University, Özbəkistan-Finlandiya Pedaqogika İnstitutu, Vebster Universiteti (Daşkənd), Turin Politexnik Universiteti Daşkənd Filialı, Kokand Pedaqoji Universiteti, Daşkənd Əczaçılıq Universiteti, Daşkənd Dövlət İqtisadiyyat Universiteti olmaqla 40-dan çox nümayəndə artıq Bakıdadırlar. Proqram çərçivəsində qonaqlar bugün Fəxri Xiyabanda Ümummilli lider Heydər Əliyevin məzarını, Şəhidlər Xiyabanını ziyarət ediblər. Özbək qonaqlar Bakı Dövlət Universitetini ziyarət edərək rektor Elçin Babayevlə, daha sonra isə müxtəlif fakültə rəhbərlərilə görüşüb əməkdaşlıq imkanlarını müzakirə ediblər.
Özbəkistan universitetlərinin nümayəndələrinin 3 mayda keçiriləcək sərgiyə qatılması ilə azərbaycanlı gənclər, tədbirə gələnlər bu ali məktəblərlə tanış olmaq, suallarına cavab almaq imkanı qazanacaqlar. Sərgidə bakalavr, magistr və doktorantura proqramları, tibb, mühəndislik, İT və digər tələbatlı ixtisaslar, universitet nümayəndələri ilə birbaşa görüş, təqaüd imkanları, təhsil imkanları və qəbul şərtləri haqqında geniş məlumat əldə etmək mümkün olacaq.
Qeyd edək ki, sərginin informasiya dəstəkçisi Crossmedia.az Analitik İnformasiya Portalıdır.
Zəhra Ağayeva
Fatimə Nəbiyeva
11:39 02.05.2025
Oxunuş sayı: 3800
