Suriyada druz icması ilə hökumət arasında atəşkəs əldə olunub
Suriyanın paytaxtı Dəməşqin ətrafındakı Əşrəfiyyə Səhnaya və Cəramanə bölgələrində son günlər baş verən silahlı qarşıdurmalardan sonra bölgədə gərginliyin azaldılması istiqamətində mühüm addım atılıb. Druz icmasının dini liderləri ilə Suriya hökuməti nümayəndələri arasında keçirilən görüş nəticəsində atəşkəs razılaşması əldə olunub.
Crossmedia.az xarici mediaya istinadən bildirir ki, əldə olunmuş razılaşmaya əsasən, tərəflər bölgədə atəşin tamamilə dayandırılması və sabitliyin təmin olunması barədə razılığa gəliblər. Bundan əlavə, yaranmış problemlərin dinc yolla həlli və gələcəkdə baş verə biləcək toqquşmaların qarşısının alınması məqsədilə birgə komitə yaradılıb. Komitənin əsas məqsədi tərəflər arasında dialoqun davamlılığını təmin etmək və icmalar arasında qarşılıqlı inamı bərpa etməkdir.
Görüşdə Dəməşq, Süveyda və Kuneytra vilayətlərinin qubernatorları, eləcə də nüfuzlu druz şeyxləri – Həmmud əl-Hinnavi və Yusif əl-Carbu iştirak ediblər. Eyni zamanda, druz icması daxilində geniş dəstəyə malik olan “Rical əl-Karama” hərəkatının tanınmış liderlərindən Leys əl-Bəlus da danışıqlarda yer alıb. Müzakirələr zamanı hər iki tərəf zorakılığın daha da yayılmasının qarşısını almağın vacibliyini vurğulayıb.
Qeyd edək ki, son günlər adıçəkilən bölgələrdə hökumət qüvvələri ilə yerli druz qrupları arasında baş verən qarşıdurmalar nəticəsində bir neçə nəfərin həlak olduğu bildirilir. Əldə olunan razılaşma bu qanlı hadisələrin təkrarlanmaması üçün əhəmiyyətli bir addım hesab olunur. Hazırda bölgədə sakitliyin bərpa edildiyi və birgə komitənin fəaliyyətə başladığı qeyd olunur.
Fatimə Nəbiyeva
10:26 01.05.2025
Oxunuş sayı: 10451
