ABŞ İranın neft şəbəkəsinə qarşı sanksiyaları genişləndirdi
ABŞ hökuməti İranın neft ticarəti şəbəkəsinə qarşı sanksiyaları daha da sərtləşdirib. ABŞ Maliyyə Nazirliyinin Xarici Aktivlərə Nəzarət Ofisi (OFAC) bu çərçivədə bir sıra xarici şirkətləri və bir neft tankerini sanksiyalar siyahısına əlavə edib.
Vaşinqtonun açıqlamasına görə, bu şəbəkə Tehranın qadağan olunmuş nüvə və hərbi proqramlarını maliyyələşdirməkdə mühüm rol oynayır. Yeni sanksiyalar Birləşmiş Ərəb Əmirlikləri, İran və Türkiyədə qeydiyyatdan keçmiş şirkətləri əhatə edir. Sanksiyaya məruz qalan neft tankeri də “Tehranın maraqları naminə fəaliyyət” səbəbilə hədəfə alınıb.
Rəsmi ABŞ dairələri bu addımı İranın beynəlxalq sanksiyalardan yayınmaq cəhdlərinə qarşı cavab kimi qiymətləndirir və xəbərdarlıq edir ki, bu cür fəaliyyətlərə dəstək verən bütün qurumlar məsuliyyətə cəlb olunacaq.
İran tərəfi isə hələlik məsələ ilə bağlı rəsmi reaksiya verməyib.
23:50 30.04.2025
Oxunuş sayı: 670
