Pakistan Hindistanı terrorçuları maliyyələşdirməkdə ittiham etdi
Pakistanın informasiya naziri Attaulla Tarar Hindistanı ölkəyə qarşı planlaşdırılan hücumlar üçün terrorçuları maliyyələşdirməkdə və onlardan istifadə etməkdə ittiham edib. Nazir bildirib ki, Pakistanın əlində bu iddiaları sübut edən danılmaz faktlar var. Onun sözlərinə görə, bu sübutlara mobil telefonlardan əldə edilmiş yazışmaların və görüntülərin skrinşotları da daxildir.
Crossmedia.az xarici mediaya istinadən bildirir ki, Tarar Pakistanın uzun illərdir terrorizmin qurbanı olduğunu və bu cür fəaliyyətləri dünyanın istənilən yerində qınadığını vurğulayıb. O, beynəlxalq ictimaiyyəti məsələ ilə bağlı diqqətli olmağa və regionda sülhə təhdid yaradan belə addımlara qarşı vahid mövqe sərgiləməyə çağırıb.
Bununla yanaşı, Pakistan Müdafiə Nazirliyi ölkə ordusuna “qaçınılmaz və ciddi təhlükə” yarandığı təqdirdə qabaqlayıcı zərbələr endirməyə icazə verildiyini açıqlayıb. Nazirlikdən verilən məlumatda qeyd olunub ki, bu qərar ölkənin milli təhlükəsizliyini qorumaq məqsədilə verilib və hərbi qüvvələr istənilən təhdidə dərhal cavab verməyə hazırdır.
Hindistan Hərbi Hava Qüvvələrinə məxsus dörd “Rafale” qırıcı təyyarəsi Kəşmir üzərində patrul uçuşları həyata keçirərkən Pakistan Hərbi Hava Qüvvələrinin təyyarələrinin havaya qalxması nəticəsində bölgəni tərk etməyə məcbur olub. Hadisə bölgədə gərginliyin artdığını göstərir və iki ölkə arasında münasibətlərin bir daha kəskinləşə biləcəyi ehtimalını gücləndirir.
Fatimə Nəbiyeva
22:05 30.04.2025
Oxunuş sayı: 10056
