Suriyanın cənubunda döyüşlər şiddətlənir: Dürzilər, ordu və ərəb tayfaları qarşı-qarşıya gəldi
Suriyanın cənub bölgələrində, xüsusilə Dəməşqin cənubunda yerləşən Sahnaya və ətraf kəndlərdə Suriya ordusu, silahlı dürzi qrupları və ərəb tayfaları arasında şiddətli toqquşmalar başlayıb.
Crossmedia.az xarici mediaya istinadən bildirir ki, Əs-Suveydadan çıxan silahlı dürzilərdən ibarət kolonna Sahnaya istiqamətində hərəkət edən zaman ərəb tayfaları onların qarşısını kəsib. Ardınca Baraq kəndi yaxınlığında da toqquşmalar qeydə alınıb. Dürzilər Sahnayaya daxil olmağa çalışarkən silahlı qarşıdurma daha da genişlənib.
Suriya ordusu hazırda Sahnaya bölgəsinə hücum əməliyyatına başlayıb. Ərəb tayfaları isə Əs-Suveyda ilə Dəməşq arasındakı əsas yolu bağlayaraq dürzi qruplarının bölgəyə əlavə qüvvə göndərməsinin qarşısını almağa çalışır. Bu arada Suriya rejiminə bağlı yeni hərbi kolonnanın Sahnaya istiqamətində yola çıxmağa hazırlaşdığı bildirilib. Rəsmi səbəb olaraq “toqquşmaları dayandırmaq” göstərilsə də, vəziyyət daha da gərginləşir.
Eyni zamanda, İsrailə məxsus pilotsuz uçuş aparatının Dəməşqə yaxın yerləşən Caramana qəsəbəsinin kənarında hava zərbəsi endirdiyi bildirilir. İsrail hücumu nəticəsində Suriya təhlükəsizlik qüvvələrinin bir əməkdaşı ölüb, bir neçəsi isə yaralanıb. Suriya Daxili İşlər Nazirliyi bu hücumun bu gün səhər saatlarından etibarən Sahnaya ətrafında İsrailin həyata keçirdiyi ikinci zərbə olduğunu bəyan edib. Həmçinin məlumat verilir ki, Sahnayada təhlükəsizlik qüvvələri dürzilər tərəfindən mühasirəyə alınıb.
İsraildə yaşayan dürzilər də hadisələrə reaksiya verərək yolları bağlayıb və İsrail ordusundan Suriyaya qarşı tədbir görülməsini tələb ediblər. Eyni zamanda, İsraildəki tanınmış dürzi lider Şeyx Muvəffəq Tarif verdiyi bəyanatda bildirib: “İsrail bizimlədir, İsrail ordusu bizimlədir və bütün dünya bizimlədir.” Bu açıqlama baş verən hadisələrin beynəlxalq rezonans doğurduğunu göstərir.
Hazırda Əs-Suveydadan Dəməşqə doğru irəliləyən böyük dürzi silahlı qruplarının hərəkəti müşahidə olunur. Suriya ordusunun isə Əs-Suveyda bölgəsinə doğru hərbi əməliyyatlara başladığı qeyd olunur.
Fatimə Nəbiyeva
20:55 30.04.2025
Oxunuş sayı: 9318
