Türkiyə Mərkəzi Asiya ölkələrinin Kiprlə bağlı mövqeyindən narazıdır
Türkiyə Böyük Millət Məclisinin sədri Numan Kurtulmuş Mərkəzi Asiya ölkələrinin Kipr məsələsində tutduğu mövqeyin Ankarada ciddi narazılıq doğurduğunu bildirib. Onun sözlərinə görə, Qırğızıstan və Özbəkistanın Kiprdə səfirliyi yoxdur, digər ölkələr isə bu işi qonşu ölkələrdəki səfirlikləri vasitəsilə həyata keçirirlər. “Əslində, Türkiyə belə bir addımı gözləmirdi. Bu qərar bizi dərin şəkildə məyus etdi,” – deyə Kurtulmuş verdiyi müsahibədə bildirib.
Crossmedia.az xarici mediaya istinadən bildirir ki, Numan Kurtulmuş Qırğızıstan, Özbəkistan və Qazaxıstan rəsmiləri ilə bu məsələni müzakirə etdiyini və onların bu barədə “müsbət” reaksiya verdiyini qeyd edib. “Türkiyə sizə üçüncü ölkələrlə necə münasibət quracağınızı demir, lakin biz, qardaş ölkələr olaraq, bu mövzuda ciddi narahatıq və hesab edirik ki, yaranmış vəziyyəti düzəltmək üçün addımlar atılmalıdır,” – deyə TBMM sədri əlavə edib.
Onun fikrincə, Mərkəzi Asiya ölkələri Şimali Kiprdə nümayəndəlik aça və ya başqa ölkələrdəki səfirliklərini orada akkreditə edə, eyni zamanda mədəni əməkdaşlıq proqramları vasitəsilə əlaqələri inkişaf etdirə bilərlər.
Qeyd edək ki, “Mərkəzi Asiya–Avropa İttifaqı” sammiti çərçivəsində qəbul edilən birgə bəyannamədə Qazaxıstan, Özbəkistan, Qırğızıstan və Türkmənistan BMT-nin 541 və 550 saylı qətnamələrini dəstəklədiklərini bildiriblər. Bu qətnamələrdə Şimali Kipr Türk Respublikasının müstəqillik elanının və bütün separatçı addımların hüquqi baxımdan etibarsız olduğu vurğulanır.
Fatimə Nəbiyeva
20:36 30.04.2025
Oxunuş sayı: 11024
