Aİ-nin sərhəd mühafizə agentliyindən Yunanıstana xəbərdarlıq
Avropa İttifaqının sərhədlərinin mühafizəsinə cavabdeh agentliyi Frontex, miqrantlara qarşı münasibəti səbəbilə Yunanıstana xəbərdarlıq edib.
Crossmedia.az xarici mətbuata istinadən xəbər verir ki, Frontex-in Əsas Hüquqlar üzrə Məsul nümayəndəsi Yonas Qrimheden Yunanıstanın miqrantlara qarşı münasibətinə görə Avropa Komissiyasının bu ölkəyə qarşı “pozuntu proseduru”na başlaya biləcəyi barədə siqnal verib. Grimheden, “Politico” xəbər saytına verdiyi açıqlamada bildirib ki, Yunanıstanın davranışı Frontex-i ya missiyasını dayandırmaq, ya da Avropa Komissiyasından rəsmi araşdırmaya başlamasını tələb etmək seçimləri ilə üz-üzə qoyur.
“Missiya dayandırılsa, necə daxil olduqlarını öyrənə bilmərik”
O qeyd edib ki, əgər Frontex Yunanıstandakı missiyasını dayandırsa və ölkəni tərk etsə, miqrantların ölkəyə necə daxil olduqlarını müəyyən etmək mümkün olmayacaq.
Qrimheden bildirib ki, Frontex nəzarət və şəffaflığı təmin edir, lakin “bir növ cəza tədbiri olmalıdır”. Onun sözlərinə görə, Avropa Komissiyası üzv dövlətdə insan hüquqları pozuntularına görə “pozuntu proseduru” başlatmaq səlahiyyətinə malikdir və bu məsələni yalnız Frontex həll edə bilməz.
Qrimheden həmçinin qeyd edib ki, komissiya Yunanıstanın sığınanlarla bağlı insan hüquqları sahəsindəki irəliləyişini Aİ fondlarına çıxışı ilə əlaqələndirə bilər. Əgər Afina miqrantlara qarşı öhdəliklərindən yayınmağa davam edərsə, Komissiya Avropa Ədalət Məhkəməsində hüquqi proses başlada bilər.
Sonda Qrimheden bildirib ki, Yunanıstan xəbərdarlıqları nəzərə almasa, Frontex bu ölkə ilə birgə maliyyələşdirdiyi sahil mühafizəsi gəmilərindən maliyyə vəsaitini geri çəkə bilər.
Mədinə Cəlilova
22:30 25.04.2025
Oxunuş sayı: 724
