Təl-Əvivdə güclü etiraz: Divarlar qəzzalı uşaqların fotoları ilə doldu
İsrail polisinin yasaqlarına baxmayaraq, Təl-Əvivdəki reklam lövhələri Qəzzada İsrail bombardmanında həlak olan fələstinli uşaqların şəkilləri ilə doldurulub.
Crossmedia.az xarici KİV-ə istinadən xəbər verir ki, israilli və ərəb fəalların birgə yaratdığı “Birlikdə Dayanırıq” (Standing Together) adlı qeyri-hökumət təşkilatı bütün maneələrə baxmayaraq Təl-Əvivdəki reklam lövhələrinə fələstinli uşaqların fotolarını yerləşdirmək üçün kampaniyaya başlayıb. İanələr vasitəsilə reklam panolarını icarəyə götürən təşkilatın təşəbbüsü İsraildə böyük marağa səbəb olub.
Təşkilatın rəhbərləri Alon-Li Qrin və Roula Daoud kampaniyanı və İsrailin Qəzzada baş verənləri gizlətmə cəhdlərini şərh ediblər. Qrin bildirib ki, məqsədləri işğalı, savaşı və ölümləri dayandırmaqla bərabərlik və sülhə nail olmaqdır. O qeyd edib ki, İsraildə demokratik azadlıqlar uzun müddətdir ki, geriləyir və bu proses Qəzzaya hücumlarla daha da sürətlənib. Son 18 ayda polis onlara nümayiş keçirməyə icazə verməyib.
“Əgər siz İsrail vətəndaşı olan fələstinlisinizsə və internetdə Qəzzadaki uşaqlarla bağlı nəsə yazırsınızsa, həbs edilə bilərsiniz”, – deyə Qrin bildirib. O əlavə edib ki, bu həftə aksiya üçün polisə müraciət etdiklərində onlara Qəzzada öldürülən uşaqların fotolarını daşımaq və “soyqırımı” kimi ifadələr işlətməmək barədə xəbərdarlıq edilib. Bu xəbərdarlığa qarşı cavab olaraq, “Tabe olmayacağıq, imtina etməyəcəyik və susmayacağıq”, - deyə bildirib.
Qrin bu xəbərdarlığı ictimailəşdirdiklərini və bununla kifayətlənməyərək, şəhərdəki bütün avtobus dayanacaqlarına və digər ərazilərə Qəzzədə İsrailin bombardmanlarında həlak olan uşaqların fotolarını yerləşdirmək üçün yeni layihə başladacaqlarını deyib. “Biz bunu xalq mübarizəsinə çevirdik. İnsanları bu hərəkatı dəstəkləməyə çağırdıq və minlərlə vətəndaş Qəzzədə bombalarımızla öldürülən uşaqların fotolarının yer aldığı reklam lövhələrinin yerləşdirilməsi üçün ianə etdi. Üzərlərinə ‘Qəzzədə bombalarımızla 18 min uşaq öldü’ yazdıq”, – deyə əlavə edib.
O, bu mübarizənin yalnız Qəzzadaki uşaqlar üçün deyil, bütövlükdə Fələstin xalqı və həmçinin İsrail cəmiyyəti üçün də olduğunu bildirib. “Qəzzada baş verənlərə, dağıntılara və ölüm xəbərlərinə İsraildə şahid olmaq çox çətindir. Müharibə başladıqdan bəri fələstinlilərin gözündən Qəzzayə baxmaq nadir haldır”, – deyə Qrin vurğulayıb.
İsrailin Qəzzadəki hadisələrlə bağlı senzura tətbiq etdiyini və susdurma siyasəti yürütdüyünü bildirən Qrin, getdikcə daha çox israillinin bu siyasətə qarşı hərəkətə keçdiyini qeyd edib: “Bir reallıq var bu reallıqda 18 min uşaq öldürülüb. Bombalarımızla. Bu həqiqətin gözlərinin içinə baxmalıyıq”.
Qrin əlavə edib ki, bu müharibə nə Qəzzadəki fələstinlilərin həyatını xilas edəcək, nə də israilli əsirləri geri qaytaracaq: “Bu bizə heç vaxt təhlükəsizlik gətirməyəcək. Uşaq cəsədləri üzərində təhlükəsizlik qurmaq olmaz”.
İsrailin Beynəlxalq Ədalət Məhkəməsində soyqırımda ittiham olunduğu prosesə də toxunan Qrin deyib: “Beynəlxalq məhkəmə nə desə də, baş verənləri görmək və bunun dayandırılmalı olduğunu söyləmək yetərincə dəhşətlidir. Məhkəmə bunun soyqırımı olmadığını desə belə, məni burada – bu dəhşətə qarşı mübarizə apararkən görəcəksiniz”.
Mədinə Cəlilova
21:40 25.04.2025
Oxunuş sayı: 8669
