Zərərli qida məhsulları gətirilib: çox ciddi fəsadlar ola bilər – EKSPERTDƏN XƏBƏRDARLIQ
Türkmənistandan Azərbaycana gətirilən 56 ton pomidorda virus aşkarlanıb. “Katora 44” MMC-nin Türkmənistandan idxal etdiyi 56 ton pomidor məhsulundan nümunələr götürülərək müayinələrə cəlb olunub. Nümunələrin laborator müayinəsi nəticəsində məhsul partiyalarında pomidor meyvələrinin qonur qırışıqlıq virusu (Tomato brown rugose fruit virus) aşkarlanıb.
Faktla bağlı məhsul partiyalarının gömrük ərazisinin hüdudlarından kənara çıxarılması və ya məhv olunması barədə qərar qəbul edilib. Hazırda aşkar olunmuş halla bağlı qanunvericiliyə uyğun müvafiq tədbirlər görülərək, istehsalçı şirkətə məhdudiyyət tətbiq edilib və Türkmənistanın müvafiq qurumuna virus aşkarlanmış təsərrüfatda sağlamlaşdırıcı tədbirlərin görülməsi barədə bildiriş məktubu göndərilib.
Türkmənistandan gətirilən məhsullarda virus aşkar olunması ilə bağlı Crossmedia.az saytına açıqlama verən qida eksperti Elsevər Fərzəliyev bildirib ki, bu məhsulların hamısı bizim sərhəddən keçib. Sərhəddə yerləşən böyük laboratoriyamız var və orada Qida Təhlükəsizliyi Agentliyinin ciddi nəzarəti həyata keçirilir. Əgər məhsul ölkəyə daxil olubsa, deməli onu sərhəddən əsasız şəkildə buraxıblar. Bu, birinci məsələdir.
İkinci məsələ isə budur ki, kənd təsərrüfatı məhsullarında olan mikroorqanizmlər canlıdır və onlar müəyyən aqrotexniki tədbirlərlə məhv edilə bilər. Bu cür məhsullar ölkəyə daxil olarkən, onların ilkin mərhələdə zərərsizləşdirilməsi vacibdir. Əgər bu addımlar atılmayıbsa, deməli, gömrük əməkdaşlarının məsuliyyətsizliyi nəticəsində əhali zərər görə bilər. 56 ton məhsul az deyil – bu, böyük miqdarda maldır və nəticə etibarilə satışa çıxarılmalıdır. Əgər bu məhsullarda virus varsa, insanlar həmin viruslara yoluxa bilər. Axı biz haradan bilə bilərik ki, bu virus nə virusudur, bizim əhalinin orqanizmi ona qarşı dözümlüdür, ya yox?
E.Fərzəliyev qeyd edib ki, bu hal ölkə, xalq və millət üçün ciddi təhlükələr yarada bilər. Belə halların qarşısını almaq üçün məhsulların ölkəyə daxil olması zamanı daha diqqətli olmaq vacibdir. Onların tərkibi, fiziki və kimyəvi xüsusiyyətləri ilə yanaşı, bioloji və xəstəlik törədici göstəriciləri də dəqiqliklə yoxlanılmalı və yalnız sağlam olduqları təqdirdə ölkəyə daxil olmasına icazə verilməlidir.
Onun sözlərinə görə, sovet dövründə bu məsələyə ciddi yanaşılırdı. Müəssisələrdən emal müəssisələrinə məhsul göndərilərkən həmin məhsul əvvəlcə xammal meydançasında saxlanılır, nümunələr götürülərək tərkibi, keyfiyyəti, fiziki-kimyəvi və mikrobioloji göstəriciləri təhlil edilirdi. Yalnız ölkənin qanunvericiliyinin tələblərinə uyğun olan məhsullar emala qəbul edilirdi. Hazırda da eyni ciddiyyətlə yanaşmaq lazımdır.
Sonda E. Fərzəliyev vurğulayıb ki, əgər bu tədbirlər sistemli şəkildə həyata keçirilərsə, ölkəyə zərərli, xəstəlik mənbəyi olan və ya qida üçün yararsız məhsullar daxil olmayacaq və əhalinin sağlamlığı təhlükə altına düşməyəcək. Bu prosesdə isə gömrük əməkdaşlarının üzərinə böyük məsuliyyət düşür.
Pərvin Hacıyeva
11:56 22.04.2025
Oxunuş sayı: 1317
